ՄԱԿ-ի գլխավոր քարտուղար Անտոնիու Գուտերիշն անհանգստություն է հայտնել ավիաբազայի վրա հարձակման հետ կապված, որի հետևանքով ավելի քան 140 մարդ է զոհվել, այդ թվում՝ խաղաղ բնակիչներ: Շաբաթ երեկոյան ՄԱԿ-ի գլխավոր քարտուղարի գրասենյակի տարածած հայտարարության մեջ նշվում է, որ քաղաքացիական անձանց սպանությունները կարող են ռազմական հանցագործություն համարվել:
«Գլխավոր քարտուղարը խորապես անհանգստացած է Լիբայի հարավային Բրաք-էշ-Շաթի ավիաբազայում ռազմական սրումից և բոլոր կողմերին կոչ է անում զսպվածություն դրսևորել և վերականգնել հանգստությունը: Նա հատկապես մտահոգված է զոհերի մեծ թվով, նաև խաղաղ բնակիչների նկատմամբ հաշվեհարդարի մասին տեղեկություններով, որոնք եթե հաստատվեն, կարող են ռազմական հանցագործություն համարվել»,- ասվում է կոմյունիկեում:
Գուտերիշը նշել է, որ ընթացիկ իրավիճակը Լիբիայում հիշեցում է հակամարտության ռազմական լուծման բացակայության մասին: Սրա հետ կապված՝ նա լիբիական բոլոր կողմերին կոչ է արել կենտրոնանալ ձգձգվող ճգնաժամի քաղաքական կարգավորման վրա:
Բրաք-էշ-Շաթի բնակավայրի մերձակա ավիաբազան գրոհել էին հինգշաբթի առավոտյան միաժամանակ մի քանի ուղղություններով: Վերջին տվյալներով՝ ավելի քան 140 մարդ է զոհվել՝ ինչպես զինծառայողներ, այնպես էլ՝ խաղաղ բնակիչներ:
France Presse գործակալության հաղորդմամբ՝ հարձակումն իրականացրել են Տրիպոլիի կառավարությանը դաշնակից խմբավորումները, սակայն Ազգային համաձայնության կառավարությունում արդեն հերքել են մասնակցությունը հարձակման՝ դատապարտելով այն և հայտարարելով, որ ոչինչ չեն իմացել պատրաստվող գրոհի մասին։
Ներկայում Լիբիայում երկիշխանութուն է տիրում։ Երկրի արևելքում՝ Տոբրուկ քաղաքում, նստում է ժողովրդի կողմից ընտրված խորհրդարանը, իսկ արևմուտքում՝ մայրաքաղաք Տրիպոլիում, իշխում է ՄԱԿ-ի և Եվրոպայի աջակցությամբ ձևավորված Ազգային համաձայնության կառավարությունը՝ Սարաջի գլխավորությամբ։
