Բեյրութի հարավային արվարձանի բնակիչները վստահ են, որ եթե հարվածեն Դամասկոսին, «Հըզբոլլահ»-ը ձեռքերը ծալած չի նստի, գրում է Էլեն Սալոնը Le Monde թերթում հրապարակված հոդվածում:
Բեյրութի հարավային արվարձանում դեռևս հիշում են Դահիայի կենտրոնում տեղի ունեցած ահաբեկչությունը: Պայթյունի հետևանքով ոչնչացված տներից մեկի բնակչուհի Զեյնաբն ասում է, որ նման բան ոչ մեկը չէր սպասում:
«Հըզբոլլահ»-ն անվտանգության միջոցներ է ձեռնարկել: Թաղամասի մուտքի մոտ անվտանգությունը հսկում են քաղաքացիական հագուստով անձինք, որոնք ստուգում են ավտոմեքենաները, ուղևորների ինքնությունը: Զեյնաբի ամուսինը` Աբու Ժադը, չի հավատում, որ Դամասկոսի վարչակարգին կհարվածեն:
«Նրանք ժամանակ չեն ունենա հարձակվելու համար: Առաջին իսկ օդային հարվածի դեպքում ամերիկյան ռազմական բազաները հարձակման կենթարկվեն Չինաստանի, Ռուսաստանի և Իրանի կողմից: «Հըզբոլլահ»-ի ուժերը հարվածներ կհասցնեն Իսրայելին Լիբանանի հարավից»,- ասում է նա:
«Օբաման վախենում է, Իսրայելը վախենում է: Իսրայելական հողն ամբողջությամբ կոչնչացվի Իրանի և «Հըզբոլլահ»-ի կողմից, եթե հարվածեն Դամասկոսին: Ամեն ինչ վաղուց պատրաստ է: Պետք է հավատալ նրան, ինչ ասում է շեյխ Նասրալլահը»,- ասում է 22-ամյա Ալաան` «Հըզբոլլահ»-ի մարտիկ, որին կարգադրել են ուղեկցել թաղամասն այցելող լրագրողներին:
«Հըզբոլլահ» կուսակցության մեկ այլ անդամ վստահ է, որ Իսրայելը և ԱՄՆ-ը կշարունակեն «տարաձայնություն հրահրել» Լիբանանում` ղեկավարելով սունիական ծայրահեղական խմբավորումներին, որոնք ահաբեկչություններ են կատարում:
Տեղի բնակչությունն անվերապահորեն հավատում է «Հըզբոլլահ» շարժման ուժին: Ոչ կառավարությունը, ոչ «Հըզբոլլահ»-ը չեն օգնում բնակիչներին պայթյունների հետևանքով ավերված տների և բնակարանների վերականգնման հարցում: Վերանորոգման ժամանակ ահաբեկչություններից տուժածներին վերաբնակեցնում են հյուրանոցներում և ապրուստի համար որոշակի գումար են տրամադրում: Բնակիչներն ասում են, որ իրենք պատրաստ են զենքը ձեռքները վերցնելուն:
«Ես երբեք չեմ պատերազմել: Սակայն եթե շեյխ Նասրալլահն առաջարկի գալ մարդկանց օգնության, կանեմ դա»,- ասել է Սայիդը, որի յոթ զարմիկները մահացել են 2000 և 2006 թթ.:
