ՆԱՏՕ-ն ցանկանում է Լեռնային Ղարաբաղի հակամարտության շուտափույթ կարգավորում: Այս մասին Trend գործակալությանը էլեկտրոնային նամակով պատասխանել է ՆԱՏՕ-ի գլխավոր քարտուղարի Հարավային Կովկասի ու Կենտրոնական Ասիայի հարցով հատուկ ներկայացուցիչ Ջեյմս Ափաթուրայը:
«Հակամարտության կարգավորումը չափազանց կարևոր է, սակայն այն հնարավոր է միայն քաղաքական եղանակով: Այս իսկ պատճառով ՆԱՏՕ-ն ամբողջությամբ աջակցում է ԵԱՀԿ Մինսկի խմբի ջանքերին»,- ասել է նա:
Խոսելով հակամարտությանը ՆԱՏՕ-ի հնարավոր մասնակցության մասին՝ Ափաթուրայը նկատել է, որ այն ժամանակ, երբ կողմերը դեռ չեն եկել համաձայնության կարգավորման հիմնական սկզբունքների շուրջ, այդ գործընթացում ինչ-որ կազմակերպության կամ երկրի դերի մասին մտածելը վաղ է:
«Հստակ է, որ «սառեցված հակամարտությունը» իրականում չի արտացոլում իրողությունը: Երկու կողմերն էլ հաճախ հաղորդում են կրակի դադարեցման խախտումների մասին: Կան ծանր կորուստներ զինվորականների ու քաղաքացիական անձնանց կողմից»,- ասել է նա:
