Այսօր Երևանում տեղի ունեցավ Արևելյան գործընկերության անդամ երկրների արտգործնախարարների ոչ պաշտոնական հանդիպումը։ Նախարարական հանդիպումից հետո ընթանում է համատեղ մամուլի ասուլիսը՝ պատվիրակությունների ղեկավարների մասնակցությամբ: ԵՄ ընդլայնման և Եվրոպական Հարևանության քաղաքականության հարցերով հանձնակատար Շտեֆան Ֆյուլեն, բացի Արևելյան գործընկերության բոլոր անդամ երկրների մասին խոսելուց, նաև անդրադարձավ Հայաստանի՝ ԱԱ/ԽՀԱԱԳ պայմանագրերի նախաստորագրման հնարավորություններին:
ԵՄ հանձնակատարը վերահաստատեց իր հայտնած տեսակետը, որ Հայաստանը ՄՄ-ին միանալու մասին իր հայտարարությունից հետո ի վիճակի չի լինի նախաստորագրել ԱՀ/ԽՀԱԱԳ պայմանագրերը, որոնց շուրջ ԵՄ-ն ՀՀ-ի հետ բանակցել է երեքուկես տարի: Նրա ընդգծմամբ՝ ԵՄ-ն մեծ հետաքրքրություն ունի, հիմնվելով առկա ձեռքբերումների վրա, ոչ միայն շարունակել, այլև ամրապնդել համագործակցությունը Հայաստանի հետ մի շարք ոլորտներում, ինչպիսիք են ժողովրդավարության համար, կոռուպցիայի դեմ պայքարը, մարդկանց տեղաշարժի ապահովման և մի շարք այլ հարցեր: «Պատրաստ ենք քննարկել հնարավոր գաղափարներ, հասկանալ, թե ինչպես են պատկերացնում մեր հայ գործընկերները մեր հարաբերությունների ապագա իրավական շրջանակը, այն հնարավորությունները, որոնք առաջարկվում են բոլոր գործընկերներին»,- պարզաբանեց Շտեֆան Ֆյուլեն՝ շարունակելով, որ ԱԱ-ն մեկ համաձայնագիր է, երկու համաձայնագիր չկա, երկու մաս կա մեկ համաձայնագրում, որի շուրջ բանակցել են հայ գործընկերների հետ, և հստակ կապեր կան երկու մասերի միջև: Ուստի, նրա համոզմամբ, հնարավոր չէ մեկն առանձնացնել մյուսից:
ԵՄ ընդլայնման և Եվրոպական Հարևանության քաղաքականության հարցերով հանձնակատարը նաև ասաց, որ եկել է, որպեսզի լսի իր հայ գործընկերների հավակնությունները: Եթե ցանկանան նոր իրավական շրջանակ տեսնել, որը համագործակցությունն առաջ կտանի, քան գործող համաձայնագիրը, ապա ուրախ կլինեն աշխատելու: «Որքանով կկարողանանք ապահովել նախքան Վիլնյուսը՝ կասկածում եմ, քանի որ խոսքը լուրջ փաստաթղթի մասին է: Լիահույս եմ, որ գագաթնաժողովը կօգտագործվի, որ տա այս գործընթացի մեկնարկը. մենք դեռևս քննարկումների և բանակցությունների մեջ ենք»,- ասաց Շտեֆան Ֆյուլեն:
Լուսանկարը՝ PanARMENIAN Photo-ի
