Նորվեգիայի, Շվեդիայի և Լեհաստանի արտգործնախարարները հայտարարել են, որ իրենք են սիրիական քիմիական զենքը միջազգային վերահսկողությանը հանձնելու ռուս-ամերիկյան նախաձեռնության հեղինակը:
«Նորվեգիայի և Շվեդիայի արտգործնախարարները ծրագիր են մտածել, որը Ռուսաստանը վերագրել է իրեն»,- հաղորդում է Verdens Gang պարբերականը՝ վկայակոչելով արտգործնախարար Էսպեն Էյդեին:
Լեհերն ավելի համեստ են. «Չգիտեմ՝ արդյոք իմ բանակցություններն այդքան մեծ նշանակություն ունեցա՞ն, ինչպես գրում են Die Welt-ը կամ The New York Times-ը, սակայն գիտեմ, որ Սիրիայի հետ կապված իրավիճակում Լեհաստանն աշխարհին օգուտ տվեց»,- Rzeczpospolita պարբերականին ասել է Լեհաստանի արտգործնախարար Ռադոսլավ Սիրկորսկին:
«Ռոսիյսկայա Գազետա»-ն հիշեցնում է, որ սիրիական խնդրի քաղաքական լուծման հույսեր հայտնվեցին սեպտեմբերի 9-ին՝ ԱՄՆ պետքարտուղար Ջոն Քերիի և ՌԴ արտգործնախարար Սերգեյ Լավրովի մամլո ասուլիսից հետո, երբ պետքարտուղարը հայտարարեց, որ Ալ-Ասադը կարող է խուսափել ռմբակոծությունից, եթե փոխանցի քիմիական զենքը, իսկ Ռուսաստանը ստանձնեց այդ առաքելության գործնական իրագործումը: Լավրովը Սիրիային կոչ արեց ոչ միայն քիմիական զենքը հանձնել միջազգային վերահսկողությանը, այլ նաև անդամակցել քիմիական զենքի ոչնչացման մասին պայմանագրին:
Սակայն Նորվեգիայի արտաքին քաղաքական գերատեսչության ղեկավարը պնդում է, որ «այդ գաղափարը ծնվել է հյուսիսային երկրներում»:
Նորվեգական ԶԼՄ-ների համաձայն՝ այս գաղափարը քննարկվել է հյուսիսային և մերձբալթյան երկրների արտգործնախարարների կողմից՝ մինչ ԱՄՆ նախագահ Բարաք Օբամային Ստոկհոլմ կատարած այցի ժամանակ (սեպտեմբերի 4-5) ներկայացվելը: Գաղափարի մասին տեղեկացրել են նաև Լավրովին: Verdens Gang-ը պնդում է, որ ռուսական դիվանագիտության ղեկավարը խոստացավ մտածել այդ գաղափարի շուրջ: ԶԼՄ-ների փոխանցմամբ՝ նույն բանը, սակայն օգոստոսի 29-ին Լեհաստանի արտգործնախարարին ասել է Քերին և հաղորդել, որ կխոսի Լավրովի հետ: