«Աշխատանքային նորմալ հարաբերություններ են»,- խոսելով ՀՀԿ-ԲՀԿ հարաբերությունների մասին՝ այսօր լրագրողներին հետ հանդիպման ժամանակ ասաց ՀՀԿ խմբակցության քարտուղար Էդուարդ Շարմազանովը՝ հավելելով, որ կոալիցիոն հուշագիրը դեռ չի նշանակում, թե բոլորը գնալու են միասնական ցուցակով:
Շարմազանովը տեղեկացրեց, որ ՀՀԿ-ն հերթական խորհրդարանական ընտրությունների նախընտրական կամպանիայի հետ կապված որևէ հարց դեռևս չի քննարկել. «Մենք հակված ենք այդ խնդիրները քննարկել ուշ աշնանը` դեպի դեկտեմբեր, երբ կլինի մեր համագումարը: Ինչ վերաբերում է մեր կոալիցիոն գործընկեր ԲՀԿ-ին, ապա ցանկացած կուսակցություն ինքն է որոշում ինչպիսի մարտավարությամբ առաջ շարժվել: Դա խախտում չէ՝ եթե հուշագրից հետ կանգնած լինեին, ապա կոալիցիայում չէին լինի»:
Հարցին, թե ինչի շուրջ պետք է երկխոսեն ընդդիմությունն ու իշխանությունը, և արդյոք այդ երկխոսությունից չի նեղացել ԲՀԿ-ն, Շարմազանովն արձագանքեց. «Դուք ավելի կոնկրետ հարց տվեք, ուզում եք ասել գործարք կա՞, թե՞ ոչ»:
Այնուհետև նկատեց, որ իրենք երկխոսելու են բոլոր քաղաքական ուժերի հետ կարևորագույն հարցերի շուրջ, իսկ թե ինչպիսի տեսք կունենա ապագա խորհրդարանը, կախված է ժողովրդի քվեարկությունից:
Խոսելով Դաշնակցության՝ Կառավարությանն անվստահություն հայտնելու նախաձեռնության քվեարկությունն ԱԺ-ում տապալվելու վերաբերյալ՝ Շարմազանովը նկատեց, որ դեմ քվեարկած 13 հոգուց մեկն էլ ինքն է եղել. «Մնացածի մի մասի կոճակը չի աշխատել, մի մասն էլ չի քվեարկել»:
Շարմազանովը նկատեց, որ նման քվեարկության պատճառն հիմնականում եղել է տեխնիկական, ինչպես նաև խնդիր է դրված եղել չընդունել Դաշնակցության այդ առաջարկը:
Ռոբերտ Քոչարյանի՝ քաղաքական գործընթացներին վերադառնալու հավանականության վերաբերյալ հարցին պատասխանելով, ՀՀԿ խմբակցության քարտուղարը նկատեց, որ ինքը շատ հանգիստ է վերաբերվում բոլոր քաղաքական պրոյեկտներին և նկրտումներին՝ կլինի դա երկրո՞րդ նախագահը, թե՞ մեկ այլ անձ: