«Պերմյակովը չպետք է հանձնվեր ռուսական կողմին, նա ձերբակալվել էր Հայաստանի տարածքում և պետք է մնար Հայաստանի տարածքում, բայց ես շատ փոքր մարդ եմ, պետությունն է դա որոշում»,- այս մասին «Առաջին լրատվական»- ի հետ զրույցում ասաց Շիրակի թեմի առաջնորդ Միքայել եպիսկոպոս Աջապահյանը՝ անդրադառնալով դիտարկմանը, որ Ավետիսյանների 7 հոգանոց ընտանիքի սպանության մեջ մեղադրվող Վալերի Պերմյակովը շուտով կարտահանձնվի Ռուսաստանին:
Սրբազանը նաև հավելեց, որ Պերմյակովի միակողմանի արտահանձնման դեպքում խնդիր է տեսնում եմ. «Թերևս դա ոչ թե արտահանձնում է, այլ գուցե փոխանակում է, որից մենք տեղյակ չենք: Բայց փոխանակման դեպքում էլ ես կողմ կլինեի, որ դա լիներ համարժեք»:
Աջապահյանը կարծիք հայտնեց, որ, այնուամենայնիվ, այս քայլը բողոքի ալիք չի բարձրացնի Գյումրիում: Նրա խոսքով՝ չի կարելի ասել, թե ռուսական ռազմաբազան փորձանք է դարձել գյումրեցիների համար. «Բազմաթիվ գյումրեցիներ աշխատում են այնտեղ և հաց են վաստակում, բայց երբեմն տեղի են ունենում անցանկալի իրադարձություններ. անձամբ ես շատ ուրախ չեմ օտար երկրի ռազմաբազայի առկայությամբ»:
Անդրադառնալով նոր խորհրդարանի ձևավորմանը, Շիրակի թեմի առաջնորդը նշեց. «Որակապես որևէ լուրջ փոփոխություն չկա, նույն պառլամենտն է՝ փոքրիկ մակիաժով»:
Մանրամասները՝ տեսանյութում: