Հայտնի դարձավ, որ առաջիկայում փակվելու է ԵԱՀԿ երևանյան գրասենյակը, ինչի կապակցությամբ արդեն Միացյալ Նահանգներն իր ափսոսանքն է հայտնել, որ Հարավային Կովկասում փաստորեն վերջին կետն է կորցնում: «Առաջին լրատվական»- ի հետ զրույցում անդրադառանալով հարցին, թե սրանով ինչ վտանգներ և ինչ կորուստներ են սպառնում Հայաստանին, ԱԺ պատգամավոր Էդմոն Մարուքյանը նշեց. «Ինչպես գիտեք 2015թ-ին Ադրբեջանը Բաքվում փակեց ԵԱՀԿ Բաքվի գրասենյակը, որից հետո անդամ պետությունների անհետաքրքրվածություն ասեմ, անփություն, թե շահագրգիռ չլինելը, օգտվելով այդ իրավիճակից և ԵԱՀԿ ընթացակարգերից, այնպես արեց, որ ԵԱՀԿ երևանյան գրասենյակը նույնպես փակվեց»:
Մարուքյանի կարծիքով՝ ԵԱՀԿ երևանյան գրասենյակի փակվելը մեծ կորուստ է Հայաստանի համար, առաջին հերթին սա մեծ հարված է Հայաստանում իրականացվող բարեփոխումներին, քանի որ ԵԱՀԿ գրասենյակը ներգրավված էր բազմաթիվ բարեփոխումների իրականացման գործընթացների մեջ և սերտ համագործակցում էր և՛ կառավարության, և՛ հասարակական սեկտորի հետ:
«Ազատ մտածող մարդիկ, կարծում եմ, ցավ են ապրում՝ ԵԱՀԿ գրասենյակի փակման հետ կապված: Զարմանալի է Ռուսաստանի Դաշնության դերը, որը որևէ ռեալ, արդյունավետ քայլ չի արել Հայաստանի շահերը պաշտպանելու առումով և համոզելու, ճնշելու Ադրբեջանին, որ իր ապակառուցողական դիրքորոշումից հրաժարվի: ԵԱՀԿ երևանյան գրասենյակի ղեկավարը ՌԴ ներկայացուցիչ էր և Ռուսաստանի դիվանագետ, անգամ այս հանգամանքը ՌԴ-ի համար ոչինչ չի նշանակել:
Կարծում եմ՝ սա ձեռնտու էր նաև ՌԴ-ին, քանի որ Հարավային Կովկասում ԵԱՀԿ-ն կորցնում է իր վերջին հենակետը, որը զբաղված էր ժողովրդավարության աջակցությամբ, Մարդու իրավունքների պաշտպանությամբ և այլն»,- նշեց Մարուքյանը՝ հավելելով, որ մենք կորցրեցինք կարևոր ռեսուրս:
Մանրամասները՝ տեսանյութում:
