«Եթե այս երկրում մի շատ կարևոր կառույց կա, որն իր խնդիրն իրականացնում է, անկեղծորեն ասեմ, ոստիկանությունն է: Այսօր համեմատած շատ-շատ այլ երկրների հետ, մեր երկրի քաղաքացին, փողոց դուրս գալիս պաշտպանված է, դա խնդրում եմ երբեք մի՛ ժխտեք և մի՛ անտեսեք»,- այս մասին այսօր լրագրողների հետ զրույցում ասաց ԱԺ ՀՀԿ խմբակցության պատգամավոր, նախկին ոստիկանապետ Ալիկ Սարգսյանը:
Անդրադառնալով դիտարկմանը, որ ոստիկանությունը կոպիտ է քաղաքական հավաքների ժամանակ, նա նշեց. «Չէի ասի, թե կոպիտ են, երբեմն մասսայական միջոցառումների ժամանակ նման բաներ լինում են՝ նման վերաբերմունք կամ պահվածք: Այնուամենայնիվ, համապատասխան մարմիները հետաքննություն կատարեցին, պարզաբանեցին, դա իր գնահատականը ստացավ, ես չէ, որ պիտի գնահատեմ: Կարող է մի քիչ կոպիտ ստացվեց, ես չգիտեմ, այնուամենայնիվ, հակառակ կողմից էլ այդ կոպտությունը դրսևորվեց, որը ադեկվատ պատասխան պիտի ստանար: Ես գտնում եմ, որ այս ամեն ինչը համապատասխանում է: Հեռուստատեսությամբ ես տեսնում էի, որ ոստիկանությունը ծանր վիճակի մեջ է, ինչ-որ կերպ դա պիտի կանխվեր»:
Անդրադառնալով ԱԺ-ում իր գործունեության վերաբերյալ հարցին՝ ՀՀԿ ցուցակով ընտրված պատգամավորը նշեց. «Ամեն դեպքում ծուռումուռ մի բան չեմ անի, փափկասուն չեմ լինի, ոչ էլ խիստ ենթարկվող, որ ինչ-որ ցուցումներ լինի՝ էսպես ես անում, էնպես ես անում: Ես իմ սեփական հայացքները կարող եմ ինչ-որ կերպ ներկայացնել»:
Մանրամասները՝ տեսանյութում:
