Հունիսի 1-ից հանրապետությունում կմեկնարկեն միասնական քննությունները:
Գնահատման և թեստավորման կենտրոնի մամուլի խոսնակ Գայանե Մանուկյանից փորձեցինք ճշտել, թե ինչ փոփոխություններ կլինեն այս տարվա քննական թեստերում, և արդյոք ձեռնարկվում են քայլեր նախորդ տարիների լարված մթնոլորտից և իրավացի դժգոհություններից խուսափելու համար։
«Եթե օբյեկտիվ հայացք նետենք, բուռն քննարկումներ և դժգոհություններ տեղի են ունենում հայոց լեզու և գրականություն առարկայի քննություններից հետո. մնացած առարկաների շուրջ, եթե համեմատենք, այդպիսի բուռն քննարկումներ տեղի չեն ունենում»,- նշեց Գայանե Մանուկյանը և համոզմունք հայտնեց, որ դրական միավորի շեմը հաղթահարելու համար նախատեսված առաջադրանքների հեշտացումը ինչ-որ կերպ կնպաստի նաև ստեղծված լարված մթնոլորտը մեղմացնելուն։
Երբ Գայանե Մանուկյանին հիշեցրիք, որ հիմնական դժգոհությունները դրական շեմը հաղթահարելու համար չէին, այլ շատ ավելի բարձր միավոր ստացած դիմորդներ և մի շարք մասնագետներ անընդունելի էին համարում թեստերի նման կառուցվածքն ու շփոթեցնող բովանդակությունը, վերջինս տեղեկացրեց, որ.
«Ամեն տարի էլ թեստերը կազմող աշխատանքային խմբերին տրվում է հանձնարարական, որպեսզի առաջադրանքները շատ հստակ կազմված լինեն, դպրոցական դասագրքերից դուրս որևէ հարցադրում չլինի, և երկակի պատասխաններով առաջադրանքներ չլինեն»։
Այդ դեպքում ինչու՞ են վստահ, և ի՞նչ երաշխիքներ ունեն, որ այս տարի այդ հանձնարարականը կատարվելու է այն դեպքում, երբ նախորդ տարիներին, փաստորեն, դա տեղի չի ունեցել, ԳԹԿ մամուլի խոսնակ Գայանե Մանուկյանը պատասխանեց.
«Մեզ մնում է միայն սպասել ընդամենը մի քանի օր և տեսնել. այդպիսի հրահանգ իջեցվել է»։