«Գագիկ Ծառուկյանի թիկնազորի պետը իմ մոտիկ ընկերն ա, և իմ մյուս ընկերոջ՝ Աբրահամ Մանուկյանի հետ պարզապես իմ տուն էին եկել՝ ինձ տեսնելու»,- «Առաջին լրատվական»-ի հետ զրույցում ասաց արդեն պատգամավոր Նապոլեոն Ազիզյանը:
Մեր դիտարկմանը, թե երեկ էին շնորհավորելո՞ւ պատգամավոր դառնալու կապակցությամբ, Ազիզյանը արձագանքեց. «Ոչ, մինչև ԿԸՀ դիմում տալն էին եկել, չգիտեմ, թե մամուլը ինչու դրանից մեծ աղմուկ բարձրացրեց: Իմ ընկերները եկել էին ինձ տեսնելու:
Հարցին՝ իսկ գուցե՞ Ծառուկյանի թիկնազորի պետը եկել էր համոզելու դեմ չգնալ Ծառուկյանին և ԿԸՀ-ից դիմումը հետ չվերցնել: «Ոչ, ոչ մեկ ինձ չի համոզել: Արդեն ասացի, որ նրանք իմ ընկերներն են և հաճախ են գալիս ինձ տեսնելու: Իսկ մնացած հարցերն արդեն փակված են: Ես արդեն պատգամավոր եմ»,- պատասխանեց Ազիզյանը։
Նշենք, որ կայքերից մեկը գրել էր, որ «Ծառուկյան» դաշինքով ներկայացված պատգամավորի թեկնածու Նապոլեոն Ազիզյանի` Կիլիկիա թաղամասում գտնվող առանձնատուն է այցելել Գագիկ Ծառուկյանի թիկնազորի պետ Էդուարդ Բաբայանը: Ըստ էության, Բաբայանի` Նապոլեոն Ազիզյանի տուն այցելելու նպատակն է Գագիկ Ծառուկյանի անունից հորդորել, որպեսզի Ազիզյանը, այնուամենայնիվ, մտքափոխվի և չվերցնի օրենքով իրեն հասանելիք պատգամավորի մանդատը: Էդուարդ Բաբայանին դիմավորել և Ազիզյանի տուն էր ուղեկցել ԱԺ գործող պատգամավոր Աբրահամ Մանուկյանը:
