«Եվրատեսիլ-2017» մրցույթի կազմակերպիչները գոյություն չունեցող կամ դիտման համար ոչ պիտանի տեղի մոտ 2 000 տոմս են վաճառել: Այս մասին «Գոլոս ստոլիցի» ռադիոկայանի եթերում ասել է տոմսերի վաճառքի Concert.ua ծառայության ղեկավար Դմիտրի Ֆելիքսովը:
Նրա խոսքով՝ այդպիսի բան է եղել, քանի որ տոմսերի իրացումը սկսվել է նախքան մրցույթի համար հարթակի կառուցման ավարտը:
Շինարարության ընթացքում դահլիճում հանդիսատեսի տեղերը փոխվել են: Հարթակի կառուցումից հետո պազվել է, որ որոշ տեղեր հնարավոր չէ տեղադրել սկզբնական նախագծի համաձայն:
«Այն բանից հետո, ինչ ընտրվել է կապալառուն և դահլիճում տեսախցիկներ են տեղադրվել, պարզվել է, որ որոշ տեղեր չեն կարող լինել այնտեղ, որտեղ նախատեսված է: Այդ պատճառով գնված որոշ տոմսերի տեղերից կա՛մ չի երևում, կամ տեսադաշտը սահմանափակ է, կա՛մ դրանք ընդհանրապես չկան»,- ասել է Ֆելիքսովը:
Հիմա գնորդներին առաջարկում են կա՛մ տոմսերը փոխել, կա՛մ վերադարձնել գումարը:
«Եվրատեսիլ-2017»-ը կանցկացվի Կիևում: Մրցույթի կիսաեզրափակիչները տեղի կունենան մայիսի 9-ին և 11-ին, եզրափակիչը՝ մայիսի 13-ին:
