Lenta.ru-ի փոխանցմամբ, Թուրքիայի Բոդրում հանգստավայրում կեղծ ալկոհոլից թունավորվելու պատճառով մահացել է մի ռուս զբոսաշրջուհի։ Խոսքը 1983 թվականին ծնված Մարիա Շալյապինայի մասին է։
Նշվում է, որ նույն պատճառով Ռուսաստանի ևս 6 քաղաքացիներ գտնվում են ծանր վիճակում և փոխադրվել են Անթալիայի ու Դենիզլիի հիվանդանոցների վերակենդանացման բաժիններ։
Ապահովագրական ընկերությունների տվյալներով, իրենց առողջական վիճակից գանգատներ ունեցող զբոսաշրջիկների բողոքները ստացվել են մայիսի 28-ին և 29-ին։ Բժիշկների օգնությանը դիմած բոլոր զբոսաշրջիկների մոտ հայտնաբերվել է անորակ ալկոհոլից թունավորում։
Հիշեցնենք, որ մայիսի 25-ին թուրքական դատարանը չեղյալ էր հայտարարել այս տարվա հունվարին ալկոհոլի վաճառքի վրա դրված սահմանափակումները, ըստ որոնց՝ ալկոհոլ գնել ցանկացողների տարիքը 18-ից բարձրացվել էր 24-ի, իսկ խանութներին արգելվել էր վաճառել փոքր շշերով սպիրտային խմիչքներ:
Նույն օրենքով արգելվել էր նաև ալկոհոլի վաճառքը զանգվածային վայրերում, ուր հավաքվում է երիտասարդությունը, այսինքն՝ փառատոների, համերգների և նմանատիպ այլ միջոցառումների ժամանակ:
Այդ ամենը պատճառաբանվել էր երիտասարդությանն ալկոհոլից հեռու պահելու անհրաժեշտությամբ: