ՀՀ իշխանությունները դրածոներ են, իսկ նրանց վարած քաղաքականությունը փալասային քաղաքականություն է, որի վրա ոչ թե ոտքերն են սրբում, այլ ավելի վատ բաներ անում: Այսօր կայացած մամուլի ասուլիսի ժամանակ նման տեսակետ հայտնեց ազատամարտիկ Սուրեն Սարգսյանը՝ հավելելով, որ Մաքսային միությանը Հայաստանի անդամակցության մասին Սերժ Սարգսյանի հայտարարությունը թեև շոկային էր, բայց ոչ անսպասելի:
«Այս համակարգն այնպիսին է, որ նշանակություն չունի, թե ով կլինի նախագահը՝ Սերժ Սարգսյա՞նը, թե՞ մեկ ուրիշը: Եթե նա մի քիչ սիրեր իր երկիրը, հիմա մեր վիճակն այսպիսին չէր լինի: Եթե պետական այրերը տարիներ շարունակ զբաղված չլինեին երկրի թալանով, ազատամարտիկը Հայաստանում պատշաճ կարգ կունենար, և այսօր էլ կռված տղերքը մի շարք անարժան մարդկանցից փող չէին մուրա՝ օրվա հացի խնդիր լուծելու համար:
Գիշատիչների ցանկությունը՝ թալանել երկիրը, Սոդոմի վերածեց մեր հայրենիքը: Կրկնում եմ՝ երկիրը պատերազմի օրոք պահած տղերքը չեն կարող գնալ և Սեյրան Օհանյանից փող խնդրել: Ազատության հրապարակում հավաքված մի քանի հոգին բոլոր ազատամարտիկների որակները չեն կարող ներկայացնել: Կրակների մեջ կռված, պատերազմի այբուբենը՝ Ա-ից մինչև Բ անցած տղաների նման արարքն անտեղի է: Ուղղակի նրանք՝ Ազատության հրապարակում հավաքվածները, իշխանությունների կուտը կերան»,- ասաց նա:
Ազատամարտիկի խոսքով՝ վաղվա խնդիրներին ինստիտուցիոնալ լուծումներ տալու համար ազատամարտիկները որոշել են ստեղծել աշխարհազոր, որի անդամ կդառնան ամենատարբեր խմբերի մարդիկ:
«Այս պահին բանակցություններ ենք վարում ՀԱԿ-ի, «Հանրապետություն» կուսակցության հետ: Բոլոր քաղաքական ուժերի հետ շփումների մեջ կլինենք: Առաջիկա մեկուկես ամսում, հուսով եմ, կբռունցքվենք՝ փորձելով վերացնել երկրի բզկտվածությունը, դադարեցնել սանձարձակությունը: Աշխարհազորն, օրինակ, պետք է կտրի Երևանի քաղաքապետարանի դիմացի այգու միասեռականների քոքը: Եթե Հայաստանում ԱՄՆ դեսպանությունն անհանգստացած է նրանց ճակատագրով, թող վերցնի տանի իր տարածք, հետները ինչքան ուզում է՝ գենդերվի: Չեմ զարմանա, որ Բաղրամյան 26-ում էլ անառականոց լինի»,- ասաց Սուրեն Սարգսյանը:
Անդրադառնալով Սյունիքի նախկին մարզպետ Սուրիկ Խաչատրյանի որդուն ազատ արձակելու փաստին՝ ազատամարտիկն ասաց. «Լիսկայի տղային ազատ արձակելն ուղղակի սանձարձակություն է: Ակտիվիստ Տիգրան Առաքելյանը մի մուշտի տվեց ոստիկանին, տարիներով նրան բանտերում քարշ են տալիս, իսկ ինչո՞ւ Սուրիկ Խաչատրյանի տղային ազատ արձակեցին»,- հարց հնչեցրեց ազատամարտիկը:
