Երբ բնակեցված շենքերին շատ մոտ նոր շենքեր են բարձրանում, հասարակության կողմից ընդվզումներն արդարացի են դառնում: Այսօր կայացած մամուլի ասուլիս ժամանակ այս մասին ասաց Հայաստանի Ճարտարապետների միության նախագահ Մկրտիչ Մինասյանը՝ անդրադառնալով Կոմիտաս 5-ի և «Փակ շուկայի» թեմաներին:
«Հաճախ մարդիկ գնում են տարածքներ, որոնց վրա, ըստ օրենքի, պետք է կառուցվի, ասենք, երեք հարկանի շենք, մինչդեռ կառուցվում է հինգ կամ ավելի հարկերով շինություն: Ինչ վերաբերում է «Փակ շուկային», ապա որպես ճարտարապետական հուշարձան՝ մենք այն անդարձ կորցրել ենք: Ակնհայտ մի շատ վատ բան է կատարվում՝ երբ ժառանգությունը վնասված է և մասնագետները բարձրաձայնում են այդ մասին, որևէ ղեկավար անձ չի հետաքրքրվում կատարվածով: Այս անտարբերությունն ու ցինիզմը վրդովեցնում են հասարակությանը»,- ասաց նա:
Մկրտիչ Մինասյանի խոսքերով, չկա քաղաքական կամք՝ կանխելու մայրաքաղաքում իրականացվող ապօրինի կառուցապատումները: «Օրենքը կա, սակայն ցավալի է, որ այն չի կիրառվում: Վախենամ՝ վաղը-մյուս օրը մեկ այլ ճարտարապետական հուշարձան էլ արժանանա «Փակ շուկայի» ճակատագրին: Նման բան թույլ չտալու համար կառավարությունը, բացի մշակույթի նախարարությունից, պետք է գործի դնի նաև իր ուժային կառույցները: Սա պետության գործն է»,- շեշտեց Ճարտարապետների միության նախագահը:
Մկրտիչ Մինասյանը նաև նկատեց, որ Ճարտարապետների միությունն իր իրավասությունների սահմաններում փորձում է կանխել ապօրինի կառուցապատումները, սակայն շատ դեպքերում՝ ապարդյուն: «Պատկան մարմիններին նամակներ ենք գրում, բայց այդ նամակներն ադպես էլ անպատասխան են մնում»,- պարզաբանեց նա:
Լուսանկարը՝ PanARMENIAN Photo-ի
