Իտալացի մի խումբ արվեստաբաններ մտադիր են մեկ ամսով Լուվրից վերցնել Լեոնարդո դա Վինչիի «Մոնա Լիզա» կտավը և ցուցադրել այն Ֆլորենցիայում, որտեղ բնակվել է նկարիչը: Ինչպես հաղորդում է The Times-ը, Ֆրանսիայի իշխանություններն արդեն համաձայնել են բանակցություններ վարել այս հարցով:
Պրոֆեսոր Սիլվանո Վինչետին, ով ղեկավարում է Իտալիայում պատմական և մշակութային ժառանգության աջակցման ազգային կոմիտեն, ասել է, որ Իտալիայում լավ հասկանում են, որ կտավը պատկանում է Ֆրանսիային և չեն հավակնում, որ այն ընդմիշտ կվերադարձվի հայրենիք:
Իտալացիները խնդրում են տրամադրել կտավը 2013 թ. դեկտեմբերի համար, քանի որ այդ ամսին լրանում է հարյուր տարին, երբ «Մոնա Լիզան» վերջին անգամ ցուցադրվել է հայրենիքում:
Վինչետին հստակեցրել է, որ ներկայում կոմիտեին հաջողվել է հավաքել շուրջ 150 հազար ստորագրություն՝ հաջակցություն այս նախաձեռնության:
Վերջին անգամ «Մոնա Լիզան» Ֆլորենցիայում ցուցադրվել է 1913 թ.: Այն Լուվրից գողացել էր թանգարանի իտալացի աշխատակից Վինչենցո Պերուջան, ում կարծիքով՝ Ֆրանսիան անօրինական էր ստացել կտավը:
