Համահայկական բնապահպանական ճակատը հայտարարություն է տարածել,որով տեղեկացնում է, որ Կապանում գործող կանադական «Դինո Գոլդ մայնինգ» ընկերությունը դատական հայց է ներկայացրել բնապահպան-ակտիվիստ Եղիա Ներսեսյանի դեմ: Եղիան մեղադրվում է ընկերության բարի համբավը արատավորելու և զրպարտության մեջ: Բանն այն է, որ ակտիվիստը 2012թ. դեկտեմբերին ԱՄՆ-ում կայացած հանդիպման ժամանակ բարձրաձայնել է Դինո Գոլդում հանքագործների նկատմամբ կատարված ոտնձգությունների և էլեկտրաշոկի կիրառման մասին:
Սեպտեմբերի 10-ը վճռի հրապարակման օրն է: Դատարանը պետք է օբյեկտիվ և արդարացի որոշում կայացնի՝ բնապահպանական խնդիրները բարձրաձայնող ակտիվիստի խոսքը չի կարող զրպարտող համարվել, իսկ աշխատողների իրավունքները բռնաբարող ընկերությունն ավելի ճիշտ կլինի իր ներքին խոհանոցը կարգի բերի: Պահանջում ենք օբյեկտիվ և արդարացի վճիռ: Չե´նք հանդուրժելու ակտիվիստի ձայնը լռեցնելու որևէ քայլ:
Սեպտեմբերի 10-ին` ժամը 16:30՝ բոլորս դեպի դատարան: Վայրը` Արաբկիր և Քանաքեռ Զեյթուն վարչական շրջանների ընդհանուր իրավասության դատարան: Ներսիսյան փողոց 10 (8-րդ հիվանդանոցի մոտ):
Հիշեցնենք, որ ընկերության թույլ տված բազմաթիվ խախտումներին հայաստանյան մամուլն անդրադարձել է՝ սկսած դեռ 2006 թ.-ից: Դինո Գոլդը ջանք չի խնայել իր բարի համբավը փրկելու համար և 2011 թվականին դիմել է աննախադեպ քայլի՝ աշխատանքից հեռացնելով գլխավոր տնօրեն Ռոբերտ Ֆալետտային և նրա կնոջը: Օրերս աշխատանքից հեռացված նախկին տնօրենը վերադարձել է Հայաստան և հարցազրույց տվել «Առավոտ» օրաթերթին, որտեղ ներկայացրել է իրեն և կնոջը աշխատանքից հեռացնելու մանրամասները: Պարզվում է, որ աշխատանքից հեռացման հիմնական պատճառ է հանդիսացել էլեկտրաշոկերի ձեռք բերման պատմությունը:
Ֆալետտաների հարցազրույցից հետո «Դինո Գոլդ մայնինգ» ընկերությունը հրավիրեց մամլո ասուլիս, որի ընթացքում Դինո Գոլդի «բարի» համբավի մասին զարմանալի բացահայտումներ ներկայացրեց ընկերության իրավաբան Սեդրակ Ասատրյանը… Մեջբերենք ընկերության իրավաբանի խոսքերը. «Ի՞նչ է կատարվել իրականում… Իրականում 2-3 տարի Կապանի նախկին Դինո Գոլդ քամփնիի ղեկավարությունը, մասնավորապես՝ տնօրեն Ռոբերտ Ֆալետտան և Ֆարիդա Ֆալետտան, մեղմ ասած, աշխատողների իրավունքները բռնաբարել են 3 տարի»:
Արդյոք «Դինո Գոլդ» ընկերությունը չի՞ պատրաստվում դատի տալ նաև իր իրավաբան Սեդրակ Ասատրյանին` կեղծ տեղեկություններ տարածելու, ընկերության բարի համբավն
արատավորելու համար, ինչպես դա արեց Եղիա Ներսեսյանի դեպքում: Թե՞ սա յուրօրինակ խոստովանության ակտ է»:
Լուսանկարը` PanARMENIAN Photo-ի