Մամուլում տեղ գտած ՀՀ ԱԺ «Ժառանգություն» խմբակցության հայտարարությունը և ահազանգը կալանքի մեջ գտնվող Տիգրան Փոստանջյանի հացադուլի և առողջական լուրջ խնդիրների վերաբերյալ ևս մեկ անգամ վկայում են, որ Հայաստանում իսպառ բացակայում է արդարադատության հիմնարար սկզբունքներից մեկը՝ օրենքի գերակայության կիրառման հավասար պայմանները բոլոր քաղաքացիների համար, հատկապես, երբ նրա նկատմամբ առաջադրված քրեական մեղադրանքը ՀՀ քրեական օրենսգրքի փոփոխության արդյունքում ուժը կորցրած է ճանաչվել:
Վարչախմբի նման գործելաոճին քաջածանոթ լինելով, ՆԺԿ-ն գտնում է, որ օրվա իշխանավորների թողտվությամբ հաշվեհարդար է իրականացվում ՀՀ ԱԺ «Ժառանգություն» խմբակցության անդամ Զարուհի Փոստանջյանի եղբոր՝ Տիգրան Փոստանջյանի նկատմամբ, նրան ապօրինի պահելով ՀՀ ԱՆ «Նուբարաշեն» քրեակատարողական հիմնարկում, և անթույլատրելի է համարում, երբ կոպտորեն խախտվում է ՀՀ Սահմանադրության հոդված 22-ի 5-րդ մասի պահանջն առ այն, որ արարքի պատժելիությունը վերացնող կամ պատիժը մեղմացնող օրենքն ունի հետադարձ ուժ:
Ելնելով վերոգրյալից՝ ՆԺԿ-ն հայտարարում է.
Իշխանությունները պարտավոր են հարգել իրենց իսկ կողմից ընդունված իրավական փաստաթղթերը (փոփոխությունը ՀՀ քր. Օր-ում և համաներման որոշումը) և անհապաղ ազատ արձակեն Տիգրան Փոստանջյանին:
«Նոր Ժամանակներ» կուսակցության վարչություն
