Իշխանությունները երևույթներին արձագանքում են միայն այն ժամանակ, երբ այդ երևույթների մասին ահազանգում են երիտասարդական խմբերը: Այսօր կայացած մամուլի ասուլիսի ժամանակ նման տեսակետ հայտնեց «Քաղաքացիական հասարակության ինստիտուտ» ՀԿ նախագահ Արտակ Կիրակոսյանը:
«Սակայն, ըստ էության, իշխանությունները ադեկվատ չեն արձագանքում քաղաքացիական նախաձեռնություններին և ձեռքերը լվանալով` մի կողմ են քաշվում` մեջտեղ բերելով ոստիկանությանը: Իսկ վերջինս առկա խնդիրները լուծում է ուժով և բռիությամբ: Ակտիվիստներն, իրենց հերթին, սեփական իրավունքները պաշտպանելու համար են փողոց դուրս գալիս»,- ասաց նա:
Արտակ Կիրակոսյանի խոսքով՝ իշխանությունները պետք է անեն ամեն ինչ` բողոքը փողոցից բերելու երկխոսության քաղաքակիրթ դաշտ, մինչդեռ նրանք մտածում են` ակտիվիստները կաղմկեն-կաղմկեն, կլռեն:
«Երբ բացակայում է երկխոսությունը, և բողոքողների շրջանում առկա է սոցիալական լարում, վիճակը կարող է վերաճել Մոսկվայի հայտնի` Բոլոտնայա հրապարակի դեպքերին: Բայց պայքարը շարունակվելու է, մեզ կմիանան նորանոր մարդիկ: Երբ կյանքը փոխելու ձևը դառնում է բողոքը, այն պետք է շարունակական լինի: Միաժամանակ՝ չպետք է թույլ տալ, որ պայքարը վերածվի երկու կողմերի միջև թշնամանքի»,- ասաց նա:
Լուսանկարը՝ PanARMENIAN Photo-ի
