Ադրբեջանական Trend լրատվական գործակալության փոխանցմամբ, Թուրքիայի նախագահ Աբդուլլահ Գյուլն այսօր աշխատանքային այցով մեկնում է Թուրքմենստան։
Թուրքմենբաշի քաղաքում Գյուլին ընդունելու է Թուրքմենստանի նախագահ Գուրբանգուլի Բերդիմուհամեդովը։ Ակնկալվում է, որ հանդիպման ժամանակ կողմերը կշոշափեն երկու երկրների փոխհարաբերություններին առնչվող խնդիրներ։
Նշվում է, որ այս հանդիպումը կլինի թուրք-թուրքմենական ակտիվ երկխոսության շարունակությունը և նոր շունչ կհաղորդի երկու երկրների փոխհարաբերություններին, որոնք միջպետական, միջկառավարական ու միջգերատեսչական մակարդակներում միմյանց միջև կնքել են ավելի քան 100 համաձայնագրեր։ Ներկայումս Թուրքմենստանում գործունեություն են ծավալել ավելի քան 600 թուրքական ընկերություններ։
Հիշեցնենք, որ 2008 թվականից գործում է թուրք-թուրքմենական տնտեսական հանձնաժողովը, որի օրակարգում են առաջին հերթին էներգետիկ համագործակցության ընդլայնմանն առնչվող խնդիրները։
Ներկայումս Ադրբեջանը դադար է վերցրել Nabucco գազատարի նախագծին միանալու հարցում, ինչի կապակցությամբ Թուրքիայի էներգետիկ ու բնական պաշարների նախարար Թաներ Յըլդըզն օրեր առաջ հայտարարեց.
«Հունիսի 6-ին Թուրքիայի Կայսերի (նախագահ Աբդուլլահ Գյուլի հայրենի) քաղաքում տեղի է ունենալու Nabucco գազատարի կոնսորցիումի կազմում ներառված ընկերությունների համաձայնագրի կնքման արարողությունը, ինչը մեծ կարևորություն է ներկայացնում նախագծի իրականացման համար:
Եվրոպայի ու Թուրքիայի համար այս նախագիծն ունի վիթխարի նշանակություն, և մենք իրավունք չունենք ժամանակ վատնել բանակցությունների վրա: Դրա համար էլ մենք կօգտագործենք Nabucco նախագծի իրականացման բոլոր հնարավորությունները։ Եթե Ադրբեջանը բացասական պատասխան տա մեզ, ապա մենք կսկսենք բանակցություններ վարել Իրանի, Իրաքի և Թուրքմենստանի հետ»։