Հայ ձկնաբույծների միության նախագահ Արկադի Գևորգյանը լիահույս է, որ Մաքսային միությանը Հայաստանի անդամակցելուց հետո իրենց արտադրանքի արտահանման ծավալները մի քանի անգամ կավելանան: Այս մասին նա ասաց «Առաջին լրատվական»-ի հետ զրույցում:
«Ինտեգրացիան ճիշտ ուղի է, և եթե Հայաստանը չինտեգրվի միջազգային կառույցներին, պարզապես տնտեսական մեկուսացման կենթարկվի: Ինչ վերաբերում է Մաքսային միությանն անդամակցությանը, ապա այն առավել նախընտրելի է: Եթե Հայաստանն ընթանա եվրոպական ուղղությամբ, ապա ակնհայտ է, որ մեր և նրանց մենթալիտետն ու մակարդակը շատ տարբեր են: Նրանք մեզ կսկսեն ավելի շատ շահագործել, քան հնարավորություններ տալ: Արդյունքում, մենք չենք կարողանա այնտեղ մեծաքանակ ապրանքներ իրացնել, արհեստական խնդիրներ կառաջանան: Երկրորդ, ժամանակ և ֆինանսներ են պետք, որպեսզի կարողանանք եվրոպական շուկայում մեզ վստահ և կայուն զգալ: Իսկ ռուսական շուկան մեզ ավելի մոտիկ ու մատչելի է: Այնտեղ ավելի շուտ կկարողանանք ծավալվել և շոշափելի արդյունքների հասնել: Շահագործումներ էլի կլինեն, սակայն՝ ավելի մեղմ: Կարծում եմ՝ Մաքսային միությանը մեր երկրի անդամակցությունից հետո արտահանման ծավալները կավելանան, մանավանդ, որ մեր ապրանքները ռուսական շուկայում ընդունվում են»,- ասաց Արկադի Գևորգյանը: