Ճապոնիայի կառավարությունը որոշել է մինի սուպերմարկետների ցանցերի 5 գլխավոր օպերատորների հետ համագործակցությամբ մշակել և երկրում ներդնել առանց վաճառողների ավտոմատացված խանութների համակարգ։ Այն պետք է աշխատի արդեն 2025 թվականին՝ հայտնում է Kyodo գործակալությունը։
Համակարգը կհիմնվի փաթեթավորման մեջ ապրանքի մասին տեղեկատվությամբ հատուկ չիպի կիրառման վրա։ Դրամարկղային սարքն ակնթարթորեն ավտոմատ կերպով կհաշվի գնված ապրանքների արժեքը հենց գնորդի զամբյուղից։
Այդ գործընթացը կտևի մոտ 10 վայրկյան։ Դրամարկղային սարքը կվերադարձնի կտրոնն ու մանրը, իսկ ռոբոտը կտեղավորի ապրանքները տոպրակում։
Համակարգն արդեն փորձարկում է անցել Օսակա պրեֆեկտուրայի Մորիգուտի քաղաքի խանութներից մեկում։
Ավտոմատ խանութների ներդրումը կապված է Ճապոնիայում վաճառողների սղության հետ, որոնց աշխատանքը գնալով ավելի թանկ է արժենում։
