ԱՄՆ նոր վարչակազմը մտադիր չէ հետևել Հյուսիսային Կորեայի հանդեպ «ռազմավարական համբերության» քաղաքականությանը։ Նման նախազգուշացմամբ է հանդես եկել ԱՄՆ փոխնախագահ Մայք Փենսը Հարավային և Հյուսիսային Կորեաների միջև փաստացի սահմանի դեր խաղացող ապառազմականացված գոտի այցի ժամանակ։ Այս մասին հայտնում է TASS գործակալությունը։
Նրա խոսքով՝ ԱՄՆ-ը վճռականորեն տրամադրված է Կորեական թերակղզում անվտանգության ապահովմանը «խաղաղ միջոցներով, բանակցային ճանապարհով»։ «Այդուհանդերձ, դիտարկվում են գործողությունների բոլոր տարբերակները, քանի դեռ մենք շարունակում ենք ուս-ուսի կանգնած մնալ Հարավային Կորեայի ժողովրդի հետ թերակղզու միջուկազերծման և Հարավային Կորեայի բնակչության երկարաժամկետ բարգավաճման ու ազատության համար»,-ընդգծել է ԱՄՆ փոխնախագահը։
Ինչպես վստահեցրել է նա՝ Սեուլի առջև Վաշինգտոնի դաշնակցային պարտավորություններն «անխախտ» են։
Նա նշել է, որ Հյուսիսային Կորեայի հրթիռա-միջուկային խնդրի հետ կապված՝ «ռազմավարական համբերության դարաշրջանը» ավարտվել է։
Բացի այդ, ինչպես հաստատել է Փենսը, ԱՄՆ-ը ակնկալում է, որ Չինաստանն ավելին կանի Կորեական թերակղզում ճգնաժամի հաղթահարման նպատակով։
