Թեև Ժիրայր Սեֆիլյանի փաստաբան Տիգրան Հայրապետյանը պնդում է, որ Սեֆիլյանի դեմ ցուցմունք տված անձի՝ Հովհաննես Պետրոսյանի մեղադրանքը փոխվել է, Հովհաննես Պետրոսյանի փաստաբան Արսեն Մկրտչյանին որևէ բան այս առումով հայտնի չէ: «Ո՛չ Հովհաննես Պետրոսյանը, ո՛չ ես պաշտոնապես որևէ տեղեկություն չունենք դրա մասին: Միայն ապրիլի 19-ին վերաքննիչ դատարանը իմ բողոքն է վարույթ ընդունել՝ կալանքի ժամկետը երկարացնելու վերաբերյալ մեր բողոքը: Որևէ պաշտոնական գրություն, փաստաթուղթ չենք ստացել»,-ասաց փաստաբանը՝ հավելելով, որ վստահ է՝ վերաքննիչ բողոքը մերժվելու է:
«Այս գործով արձանագրում ենք՝ այս գործով ավելորդ դաժանություն է դրսևորվել հատկապես Հովհաննես Պետրոսյանի նկատմամբ: Ոչ միայն Հովհաննես Պետրոսյանի նկատմամբ, այլ նաև նրա ընտանիքի: Նրա մայրը ինսուլտ է տարել, ընտանիքը գոյություն պահպանելու հնարավորություն չունի և Հովհաննես Պետրոսյանը ընտանիքի միակ կերակրողն էր: Եվ նախաքննության փուլում դրսևորած վարքագիծն այնպիսին էր, որ և՛ Հովհաննես Պետրոսյանի, և՛ մի շարք կալանավորների նկատմամբ կարելի էր կիրառել ազատազրկման հետ չկապված խափանման միջոց: Պարզապես այստեղ վարույթ իրականացնող մարմինը իրեն հատուկ դաժանություն է դրսևորում, քանի որ այլևս այն հիմնավորումները, որոնք նախատեսված են կալանքի տակ պահելու համար, մտացածին բնույթ են կրում»,-ասաց փաստաբանը: Նրա խոսքով՝ հետապնդումները կապված են ոչ միայն քննության գաղտնիությունը պահելու, այլ մարդկանց կտտանքների, զրկանքների ենթարկելու առումով, ինչը կատռարվեց Հաց բերողի հետ:
«Սա բացարձակ իշխանության հետ չկապված հարց է, այլ վարույթ իրականացնող մարմնի դաժան վերաբերմունքի հարցն է, երբ չեն կարողանում համապատասխան տեղերը զեկուցեն, իրականությունը հասցնեն դատախազություն, որ անհրաժեշտություն չկա այս մարդկանց կալանքի տակ պահել և դանդաղ մահի ենթարկել իրենց հարազատներին: Որևէ քննչական գործողություն այս տասը ամիսներին չի կատարվել: Ընտանիքը գոյություն պահպանելու որևէ հնարավորություն չունի»,-ասաց նա: Փաստաբանը նաև նշեց, որ քննչական մարմինը միտումնավոր այնպես է անում, որ դանդաղ մահի դատապարտի մեղադրյալներին, որոնց կալանքի տակ պահելու բացարձակ անհրաժեշտություն չկա:
Հիշեցնենք, որ Հովհաննես Պետրոսյանին մեղադրանք է առաջադրվել ՀՀ քր. օր.-ի 235-րդ հոդվածի 3-րդ մասով (ապօրինի կերպով զենք, ռազմամթերք, պայթուցիկ նյութեր ձեռք բերելը, իրացնելը, պահելը, փոխադրելը կամ կրելը, որոնք կատարվել են մի խումբ անձանց կողմից նախնական համաձայնությամբ)։
