ՀՀ Ֆինանսների նախարարությունը ողջունել է «Առաջին լրատվական»-ի նախաձեռնողականությունը և ուշադրությունը՝ ՀՀ ֆինանսների նախարարության կողմից e-gov կայքում հրապարակվող տեղեկատվությունը, մասնավորապես ինտերակտիվ բյուջեի միջոցով հրապարակայնացվող ծախսերն ու գնման պայմանագրերը հանրությանը հասանելի դարձնելու գործում: Նախարարության մամուլի ծառայությունը հաղորդագրություն է տարածել, որում նշել. «Այս առումով մեր նպատակներն ու մարտավարությունը համընկնում են՝ հնարավորին չափ թափանցիկ դարձնել պետական բյուջեն իր ողջ կառուցվածքով:
«Ու՞ր են հոսում կառավարության պահուստային ֆոնդի գումարները» վերտառությամբ Ձեր հրապարակած հոդվածում (07.09.2013թ. «Ժամանակ», 03.09.2013 թ. «Առաջին լրատվական») նկատել եք, որ 2013 թ. բյուջեով հիմնական բաժիններին չդասվող պահուստային ֆոնդին ուղղված ֆինանսական միջոցներն արտացոլված և հասանելի չեն բյուջեի ծախսերի ցանկում:
Մասնավորապես նշել եք. «Ճիշտ է, ընդհանուր առմամբ նշվում է, թե կոնկրետ գումարը ինչ ուղղությամբ է հատկացվել, բայց ավելի մանրամասն չի նշվում, թե դա ինչ նպատակով և կոնկրետ որ կազմակերպություններին է տրվել»:
Այս կապակցությամբ տեղեկացնում ենք, որ Ձեր կողմից նշված՝ կառավարության պահուստային ֆոնդից կատարված ծախսերը ողջ մանրամասնությամբ հասանելի չեն եղել երեք օր՝ պայմանավորված տեխնիկական-ծրագրային խափանմամբ:
Կայքն սպասարկող անձնակազմն արդեն մի քանի օր է՝ շտկել է թերությունը:
Շնորհակալ կլինենք, եթե այսուհետ նույնպես, համակարգում թերություն նկատելուն պես, մեզ տեղեկացնեք այդ մասին. դա մեզ հնարավորություն կտա արագ շտկել թերությունը և ապահովել ծրագրի անխափան աշխատանքը»:
Ֆինանսների նախարարության տեղեկատվության և հասարակայնության հետ կապերի բաժին
