Հայաստանը մեծ կարևորություն է տալիս Եվրասիական տնտեսական միության համագործակցության խթանմանը երրորդ երկրների և առանցքային ինտեգրացիոն միավորների հետ, որոնք պատրաստ են միության հետ ռեալ համագործակցության: Այս մասին Բիշքեկում Եվրասիական տնտեսական բարձրագույն խորհրդի նիստին հայտարարեց Հայաստանի Հանրապետության Նախագահ Սերժ Սարգսյանը:
«Մեր ընդհանուր տնտեսական տարածքի ձևավորումն արդեն երկրորդ տարին է` տեղի է ունենում բարդ համաշխարհային տնտեսական կոնյունկտուրայի պայմաններում, համաշխարհային տնտեսության աճի տեմպերի նվազեցման և գեոպոլիտիկ ցնցումների ֆոնին: Այս ամենը մի կողմից խոչընդոտներ է ստեղծում մեր միության լիարժեք կայացման ճանապարհին, իսկ մյուս կողմից բացում է նոր հնարավորություններ մեր երկրների ավելի սերտ համագործակցության համար»,- նշեց Սերժ Սարգսյանը: Նա ընդգծեց, որ նման պայմաններում ԵԱՏՄ երկրների կողմից ձեռնարկված համաձայնեցված գործողությ ունները թույլ են տվել կայունացնել անդամ պետություններում իրադրությունը, ցուցաբերել մակրոտնտեսական դիմացկունություն:
«2016 թվականին Հայաստանում դրական դինամիկա է նկատվել ՀՆԱ-ում, գրանցվել է տնտեսական ակտիվություն արդյունաբերության, գյուղատնտեսության և ծառայությունների ոլորտներում: Հայաստանի առևտրաշրջանառությունը ԵԱՏՄ երկրների հետ ավելացել է ավելի քան 15 տոկոսով: Հայկական ապրանքների արտահանումը ԵԱՏՄ շուկա ավելացել է 65 տոկոսով: Գրանցվել է առևտրաշրջանառության աճ նաև երրորդ երկրների հետ»,– ասաց ՀՀ Նախագահը:
Նա ընդգծեց, որ ԵԱՏՄ երկրների առջև կան զարգացման նպատակներ, որոնց հասնելու ճանապարհը արդյունաբերության մեջ ինովացիաների, բարձր տեխնոլոգիական գյուղատնտեսության, թվային տնտեսության, վերականգնվող էներգետիկայի մեջ է: Նա կարևորեց նաև համատեղ ջանքերը` ուղղված փոխշահավետ կոոպերացիաների ծրագրերի իրականացմանը:
«Մենք երկու կարևոր նպատակ ունենք: Առաջինը` միության ամրապնդում ներսից, ընդհանուր տնտեսական տարածքի հետագա ազատականացում՝ արգելքների վերացման ճանապարհով, ապրանքների ազատ տեղաշարժի ապահովում: Երկրորդը, մեծացնել ԵԱՏՄ միջազգային ներգրավվածությունը: Այս երկու նպատակները համարվում են փոխլրացնող, ազդում են կազմակերպության արդյունավետության և միջազգային հեղինակության վրա: Մենք մեծ կարևորություն ենք տալիս ԵԱՏՄ համագործակցության խթանմանը երրորդ երկրների և առանցքային ինտեգրացիոն միավորների հետ, որոնք պատրաստ են ռեալ համագործակցության:
2016 թվականին մշակվել են համագործակցության հարցեր Իրանի, Չինաստանի, Հնդկաստանի, Եգիպտոսի և այլ երկրների հետ: Հայաստանը հետաքրքրված է ձեռք բերված պայմանավորվածությունների իրավական ամրագրման հարցով, մասնավորապես Իրանի Իսլամական Հանրապետության հետ, որի հետ մեզ կապում են պրագմատիկ, փոխշահավետ և բարիդրացիական հարաբերություններ: Այս պլանում դրական ենք գնահատում փոխգործակցությունը Եվրասիական տնտեսական հանձնաժողովի և Եվրոպական հանձնաժողովի միջև»,- նշեց Սերժ Սարգսյանը:
Նա հույս հայտնեց, որ մոտ ապագայում կհստակեցվի միության շուկայում առկա և «Սպիտակ գրքում» ամրագրված ու լուծում պահանջող 60 արգելքները վերացնելու ճանապարհային քարտեզը: «Հայաստանը շարունակելու է հետագայում էլ իրականացնել նախանշված ծրագրերը` հաղթահարելու գլոբալ բացասական տնտեսական երևույթները, անցնելու կայուն տնտեսական աճի` այդ թվում և միության ինտեգրացիոն ներուժի օգտագործմամբ»,– հայտարարեց ՀՀ Նախագահը:
