Տնտեսական մրցակցության պաշտպանության պետական հանձնաժողովը վերջերս հաճախակի է տուգանքներ նշանակում այս կամ այն տնտեսվարող սուբյեկտի նկատմամբ։ Օրինակ՝ երեկ հանձնաժողովը ավելի քան 100 մլն դրամի տուգանք էր նշանակել բեռնափոխադրողների նկատմամբ՝ հակամրցակցային համաձայնության գալու համար։ Որքանո՞վ են մեծ տուգանքների ենթարկելու այս որոշումները արդյունավետ չարաշահումների դեմ պայքարում։ Այս հարցի վերաբերյալ «Առաջին լրատվականը» մեկնաբանություն խնդրեց տնտեսագետ Վահագն Խաչատրյանից։
«Գործող համակարգի պայմաններում նման որոշումները կայացվում են միայն հրահանգների միջոցով։ Երբեք նման որոշումներ չեն կայացվում՝ ելնելով սպառողների շահերից։ Ե՛վ այդ բեռնափոխադրողների, և՛ ձու արտադրողների, և՛ «Ֆրեշի» նկատմամբ հարուցված վարույթներն ու նշանակված տուգանքները այն բանի արդյունք են, որ այս տնտեսվարողները խախտել են նախօրոք պայմանավորված խաղի կանոնները։
Բայց շեշտեմ՝ ոչ թե օրենքով նախատեսված խաղի կանոնները, այլ իշխանության կողմից իրենց թելադրված խաղի կանոնները։ Այս համակարգի պայմաններում հնարավոր չէ, որ որևէ պետական մարմին աշխատի օրենքը պաշտպանելու կամ կիրառելու համար։ Այս հանձնաժողովը ես համարում եմ նոր պատժիչ մարմին իշխանության ձեռքին՝ խաղի կանոնները խախտողների կամ ավելի մեծ ինքնուրույնություն դրսևորողների դեմ»,- ասաց Վ. Խաչատրյանը։
Նրա խոսքով, նման տուգանքները նաև, այսպես ասած, «երկրորդական դրական էֆեկտ» են ապահովում իշխանությունների համար։ «Խոսքը պոպուլիստական էֆեկտի մասին է, թե տեսեք, տեսեք՝ մենք պայքարում ենք չարաշահումների, գնաճի դեմ և այլն»,- ասաց Վ. Խաչատրյանը։