Թիվ 38 ընտրատարածքում ՀՀԿ թեկնածուն Կապանի նախկին քաղաքապետ Արմեն Կարապետյանն է, ով քաղաքապետի ընտրություններում 2008 թվին պարտվել էր ՀՅԴ-ական թեկնածու Արտուր Աթայանին:
Նրա հիմնական մրցակիցը «Ժառանգության» ներկայացուցիչ Սամվել Հայրապետյանն է, երրորդ թեկնածուն՝ 1968-ին ծնված Վահրամ Հովհաննիսյանը: Սակայն, քանի որ այս տարիներին ՀՀԿ-ն մշակել է ընտրություններ կազմակերպելու կուռ համակարգ, ուստի այնքան վստահ է իր թեկնածուի «հաղթանակի» մեջ, որ առանձնապես ոչ քարոզարշավ է անում, ոչ էլ թույլ է տալիս, որ իր թեկնածուն հանդիպի ընտրողներին, զրուցի լրագրողների հետ:
Վերջին մեկ շաբաթվա ընթացքում լրագրողները ոչ մի կերպ չեն կարողանում կապվել նրա հետ: Իսկ նախօրեին «Հրապարակ» օրաթերթի լրագրողին հաջողվել է կապվել, սակայն թեկնածուն հենց հասկացել է, որ խոսողը լրագրող է, ասել է. «Ես չեմ»: Երբ լրագրողն առարկել է, թե 2 օր առաջ այս համարով հենց ինքն էր պատասխանում, վերջինս հապճեպ ասել է. «2 օր առաջ ես էի, հիմա ես չեմ»:
