ԴԱԻՇ ահաբեկչական խմբավորման զինյալները Մոսուլի ռազմական գործողություններում երեխաներին օգտագործում են որպես կենդանի վահան, դպրոցները օգտագործում են որպես իրենց բազա, լրագրողներին է հայտնել Մոսուլում ՅՈՒՆԻՍԵՖ-ի արտակարգ դրությունների գծով գլխավոր համակարգող Բաստիան Վինյոն: Այդ մասին հայտնում է RIA Novosti-ն:
«Մենք տվյալներ ունենք երեխաներին որպես կենդանի վահան օգտագործելու մասին: Այդ սխեման օգտագործվել է արևելյան Մոսուլում և այժմ կրկնվում է արևմտյան Մոսուլում։ Մարդիկ նաև վախենում են, որ իրենց կտանեն քաղաքի հին մասը։ Անկասկած մենք տեսել ենք ավելի շատ տառապող երեխաներ (արևմտյան Մոսուլից), քան եղել է արևելյան Մոսուլում»,- ասել է նա:
Վինյոնի խոսքերով` ՅՈՒՆԻՍԵՖ-ը ծայրահեղ անհանգստացած է 220 երեխաների ճակատագրով, որոնք մնում են հին քաղաքում, «շրջապատված կոալիցիայի զորքերով և գտնվելով ԴԱԻՇ-ի ձեռքերում կյանքերը ռիսկի ենթարկելով»:
Նա ավելացրել է, որ ՅՈՒՆԻՍԵՖ-ը նույնպես տեսել է ապացույց այն բանի, որ ԴԱԻՇ-ը Մոսուլում օգտագործում է դպրոցները և հասարակական վայրերը որպես իրենց բազա:
«Մենք դա տեսել ենք մեր աչքերով։ Մենք տեսել ենք ավերածություն արևելյան Մոսուլում։ Արևմտյան Մոսուլում ավերածություններն ավելի շատ են, քան մենք տեսել ենք արևելյան Մոսուլում և ընթանում են ավելի դաժան մարտեր»,- ասել է Վինյոն:
Ընդհանուր առմամբ, մարտական գործողությունների սկզբից արևմտյան Մոսուլում ՅՈՒՆԻՍԵՖ-ը գրանցել է երեխաների քանակի կտրուկ աճ, որոնք հետ են մնացել իրենց ընտանիքներից կամ փախել են մարտական գործողություններից առանց ուղեկցության:
«Մենք գրանցել ենք 1936 երեխա, որոնք ճանապարհորդել են առանց ուղեկցության, կամ բաժանվել են իրենց ընտանիքներից: Նրանց կեսն արդեն վերամիավորվել է: Սակայն, եթե մարտական գործողությունները շարունակվեն նույն ինտենսիվությամբ, այդ թվում՝ հին քաղաքում, կա շատ մեծ ռիսկ, որ երեխաները կրկին կփախչեն, մնալով առանց ուղեկցության կամ կբաժանվեն իրենց ընտանիքներից»,- ասել է նա:
Վինյոն նշել է, որ փրկված երեխաները տառապում են մղձավանջներից ու թերսնումից, և կարիք ունեն հոգեբանական օգնության:
«2016 թվականի հոկտեմբերի 17-ին Մոսուլի գործողությունների սկսվելուց հետո ընդհամենը տեղափոխվել են քառորդ միլիոն երեխաներ: Նրանցից 151 հազարը ուղարկվել են միայն վերջին 6 շաբաթվա ընթացքում մարտական գործողությունների ակտիվացումից հետո: Եվ մենք տեսնում ենք, որ արևմտյան Մոսուլից ավելի շատ երեխաներ են փախչում, քան արևելյանից»,- ավելացրել է ՅՈՒՆԻՍԵՖ-ի ներկայացուցիչը:
