«Անչափ կարևոր է, որ հետընտրական իրավիճակը բավականին խաղաղ է, դա պայմանավորված է նրանով, որ այս անգամ իշխանություններն ամեն ինչ արեցին, որ ընդդիմադիր քաղաքական ուժերը կարողանան հնարավորությունների սահմաններում վերահսկել ընտրությունբների ամբողջ ընթացքը,- «Առաջին լրատվական»- ի հետ զրույցում այս մասին ասաց «Ազգային անվտանգություն» կուսակցության մախագահ Գառնիկ Իսագուլյանը՝ հավելելով, որ նաև մեծ նշանակություն ունեցավ այն, որ իշխանությունները ընդառաջ գնացին նոր Ընտրական օրենսգրքի փոփոխությունների վերաբերյալ ընդդիմության գրեթե բոլոր առաջարկներին:
Իսագուլյանի կարծիքով՝ ընտրություններին լիարժեք պատրաստ էր միայն մեկ քաղաքական ուժ՝ ՀՀԿ-ն. «13 ընտրատեղամասերում ընտրությունները կազմակերպեցին այնպես, որ հասարակության մեծ մասին կարողացան մոբիլիզացնել»: Իսագուլյանի խոսքով, թեև չէր երևում, սակայն ամենածանր բեռն իր ուսերին վերցրեց ՀՀ նախագահ, ՀՀԿ ղեկավար Սերժ Սարգսյանը. «Ունենանալով շատ ծանրաբեռնված արտագնա գրաֆիկ, նա կարողացավ այդ ընթացքում այցելել բոլոր ընտրատարածքներ և հանդիպել բոլոր վարկանշային թեկնածուների հետ, և դա ունեցավ իր նշանակությունը»:
Իսագուլյանը չժխտեց, որ ընտրությունների ժամանակ թերացումներ են եղել. «Այո՛, թերացումներ և խնդիրներ գուցե եղել են, բայց դրանց հետ համաձայնել է ողջ ընդդիմադիր դաշտը: Եվ տարօրինակ է, որ ընտրությունների մասնակիցները նախընտրական ու ընտրական շրջանում ծպտուն չէին հանում, բայց հենց որ տեսան, որ չեն կարողացել հաղթահարել անհրաժեշտ շեմը, սկսեցին բարձրաձայնել, որ ըտրակաշառք է բաժանվել և այլն: Չեմ կարծում, որ դա ազնիվ է»: Իսագուլյանի հավաստմամբ՝ ընտրակաշառքը ՀՀ իրականության մեջ է մտել 98-99 թթ-ին, և առաջինը Գուրգեն Արսենյանն է կիրառել այդ մեթոդը և դարձել ԱԺ պատգամավոր:
Անդրադառնալով դիտարկմանը, որ Ռոբերտ Քոչարյանը խորհրդարանական ընտրություններին մասնակցություն չունեցավ, Իսագուլյանը նշեց. «Տեղին չէ Ռոբերտ Քոչարյանին անվանել «երիտասարդ թոշակառու»: Նա ակտիվ կյանքով է ապրում, և այն համակարգում, որի անդամ է, ակտիվ աշխատում է, իր տեսակետը հայտնում է»: Իսագուլյանը նաև հավելեց, որ ՕՐՕ-ն և Ռ. Քոչարյանը միմյանց հետ որևէ կապ չունեն, և հիշեցրեց, որ այդ մասին հայտարարել են և՛ ՕՐՕ-ի առաջին դեմքերը, և՛ Քոչարյանի գրասենյակը:
Մանրամասները՝ տեսանյութում:
