Խորհրդարանի գարնանային նստաշրջանի ընթացքում գրանցվել է կոալիցիոն կուսակցությունների միօրինակ քվեարկություն՝ քննարկվող հարցերը ստացել են 90 տոկոս «կողմ» և հազիվ 1 տոկոս «դեմ»: Այսօր «Ազգային ժողովի օրենսդրական գործունեության մոնիտորինգ»-ի վերաբերյալ քննարկման ժամանակ այս մասին ասաց «Մանդատ» ՀԿ-ի նախագահ Լուսինե Վասիլյանը՝ հավելելով, որ գարնանային նստաշրջանի ընթացքում կառավարության մեծ չափով օրինագծերի հարցում ԱԺ-ն
ակտիվ է եղել:
Նրա տեղեկացմամբ՝ քվեարկություններին ամենաակտիվը մասնակցել են ՀՅԴ, ամենապասիվը՝ ԲՀԿ պատգամավորները: «ՀՅԴ-ն խորհրդարանում ամենաշատ «ձեռնպահ» քվեարկած քաղաքական ուժն է, ՀԱԿ-ը՝ ամենից շատ «դեմ» քվեարկածը»,- ասաց նա:
Քննարկմանը ներկա՝ «Ազգային ժողովի օրենսդրական գործունեության մոնիտորինգ»-ի փորձագետ Գոռ Աբրահամյանն էլ նկատեց, որ ըստ դիտարկումների՝ խորհրդարանում նկատվում է ելույթների, հարցադրումների ակտիվացման միտում:
«Վիճակագրությունը ցույց է տալիս, որ նախկին 2 ելույթի փոխարեն՝ այժմ յուրաքանչյուր պատգամավորի բաժին է ընկնում 2.5 ելույթ: Խորհրդարանում անելիք կա հատկապես ներկայացուցչական գործառույթի մասով: Քննարկումներից բացակայությունների հարցն ընդհանրապես կարգավորված չէ և կախված է ԱԺ նախագահի սուբյեկտիվ վերաբերմունքից»,- ասաց նա:
ՀՅԴ պատգամավոր Արծվիկ Մինասյանը կարևորեց հատկապես կառավարության գործունեության նկատմամբ ԱԺ-ի վերահսկողական գործառույթի ուժեղացման հարցը: «Այդ գործառույթները սարսափելի վատ վիճակում են»,- նշեց նա:
Իսկ ահա ԲՀԿ պատգամավոր Տիգրան Ուրիխանյանը, անդրադառնալով Ազգային ժողովի օրենսդրական գործունեության մոնիտորինգի վիճակագրական տվյալներին, դրանցից որոշների նկատմամբ իր անհամաձայնությունը հայտնեց: «Կարծում եմ՝ հանրությունը պետք է գնահատական տա պատգամավորին՝ ըստ նրա հնչեցրած հարցերի որակի և ոչ թե քանակի, մինչդեռ մոնիտորինգի վերաբերյալ զեկույցում նշվում են թվեր, թե որ պատգամավորն է ամենաշատ թվով հարցեր հնչեցրել»,- ասաց նա:
Խորհրդարանական վերահսկողության գործառույթի ուժեղացման անհրաժեշտության վերաբերյալ իր դրական վերաբերմունքն արտահայտեց նաև ՀՀԿ պատգամավոր Հովհաննես Սահակյանը: «Շատ կարևոր խնդիր է, երբ հարց տվող պատգամավորը շարունակի մնալ դահլիճում և լսել սեփական հարցի պատասխանը: Այլապես պատասխանող կողմի խոսքը օդի մեջ է մնում»,- ասաց նա:
