Արմավիրի մարզի Ծաղկալանջ գյուղում շուրջ երկու տասնյակ բնակիչներ, նախնական տեղեկություններով, թունավորվել են խմելու ջրից: Արդեն մի քանի օր է, ինչ ծորակի ջուրը վտանգավոր է մարդկանց առողջության համար: Ըստ շրջանառվող լուրերի՝ ծորակի ջրից կարմիր որդեր են թափվել:
«Առաջին լրատվական»-ը կապվեց Էջմիածնի հիվանդանոցի ինֆեկցիոն բաժանմունքի հետ, որտեղից մեզ տեղեկացրին, որ վերջին 7 հիվանդներն արդեն երեկ դուրս են գրվել հիվանդանոցից: Ովքեր հրաժարվել են ստացիոնար բուժումից, բուժումը ստանում են տանը, իսկ հիվանդանոցն այստեղ կատարում է բակային համայցեր:
Էջմիածնի հիգիենիկ և հակահամաճարակային տեսչությունից մեզ տեղեկացրին, որ այս պահին տեսչության գլխավոր բժիշկը Ծաղկալանջում է, գյուղում ստուգումներ են անցկացվում: Ավելի վաղ տեսչությունից հայտարարվել էր, որ թունավորման պատճառը ջուրն է:
Այն տեղեկությունը, թե գյուղում ջրամատակարարման խողովակները հին են, և ջրի խնդիր միշտ կա, չկարողացանք պարզել, քանի որ գյուղապետարանից մեր հեռախոսազանգերին չպատասխանեցին:
