«Առաջին լրատվականի» հետ զրույցում, անդրադառնալով առաջիկայում Ռուսաստանում կայանալիք նախագահական ընտրություններին իշխանությունը Պուտինին փոխանցելու հավանական սցենարներին և դրանց ազդեցությանը Հայաստանի վրա, ՌԱՀՀԿ տնօրեն Մանվել Սարգսյանը նշեց.
«Իրականում էական չէ, թե ով կընտրվի Ռուսաստանի նախագահ։ Տեղի ունեցող գործընթացներին ընդհանուր կոնտեքստով պետք է նայել։ Ռուսաստանը ցանկանում է, թե չի ցանկանում` ստիպված է հաշվի նստել աշխարհում նշված, արդեն հստակեցված դրույթների հետ և ինչ-որ փոփոխությունների գնալ»։
Փորձագետը բնական է համարում, որ ավանդական կայսերական իշխանություն ունեցող այդ երկրում ամեն ինչ հարթ չի կարող ընթանալ և ամեն ինչ շատ ավելի բարդ է։
«Ռուսական իշխող էլիտան փորձեր է անում ինչ-որ փոփոխությունների գնալ, սակայն շատ չհարվածելով իր շահերին»։
Մանվել Սարգսյանը կարծում է, որ եթե Ռուսաստանում իրականում տեղի ունենան ինչ-որ փոփոխություններ, նշմարվեն դեմոկրատացման պրոցեսներ, ավելի կանոնակարգվի պետությունը, դա, միանշանակ, դրական ազդեցություն կունենա ողջ տարածաշրջանի վրա։
«Ռուսաստանը չի կարող մնալ այն վիճակում, որում ինքը կա, ինչքան էլ ցանկանա. ժամանակները պահանջում են ինչ-որ փոփոխություններ։ Դրանից հետո Հայաստանում էլ գուցե ինչ-որ փոփոխություններ լինեն՝ նկատի ունենալով այն հանգամանքը, թե որքան մեծ է Ռուսաստանի ազդեցությունը մեզ վրա»։