Իսրայելական mignews.com կայքի փոխանցմամբ, ՄԱԿ-ի գլխավոր քարտուղար Բան Կի Մունը միջերկրածովյան երկրների կառավարություններին կոչ է արել խոչընդոտել պաղեստինամետ ակտիվիստներին՝ Գազայի հատված նոր նավատորմ կազմակերպելուն ու առաքելուն։
Իր կոչում Բան Կի Մունը նշել է, որ Իսրայելի կողմից շրջափակման ենթարկված Գազայի հատվածի համար նախատեսված ողջ օգնությունը պետք է նշանակման վայր հասնի օրինական սահմանային անցակետերով։
Բացի այդ, նա Իսրայելին կոչ է արել պատասխանատվություն դրսևորել՝ բռնությունից խուսափելու համար։
Նա նաև նշել է, որ հավելյալ ժամանակ է տրամադրել հատուկ հանձնաժողովին՝ նախորդ տարի գրանցված «Մավի Մարմարայի» միջադեպի հետաքննության աշխատանքների ավարտի համար։ ՄԱԿ-ի ներկայացուցիչներից ու դիվանագետներից բաղկացած խմբի աշխատանքները դանդաղում են թուրքական ու իսրայելական կողմերի վեճերի պատճառով, որոնք չեն կարողանում հասնել կոնսենսուսի։
Հիշեցնենք, որ օրեր առաջ Թուրքիան սպառնաց դուրս գալ «Մավի Մարմարայի» միջադեպի կապակցությամբ ստեղծված հետաքննիչ խմբի կազմից՝ գտնելով, որ այն պատրաստել է իսրայելամետ զեկույց և հարցին մոտեցել է իսրայելական տեսանկյունից։
Վերջինս ստեղծվել է 2010 թվականի օգոստոսին, դրանում ներառված են Նոր Զելանդիայի նախկին վարչապետ, միջազգային ծովային իրավունքի փորձագետ Ջեֆրի Պալմերը, Իսրայելի նախկին արտգործնախարար Յոսեֆ Չեխանովերը և նախկին թուրք դիվանագետ Օզդեմ Սանբերկը: