Դեռևս փետրվար ամսին ավարտվել էր «Սասնա ծռեր»-ից 8 հոգու և Ժիրայր Սեֆիլյանի մասով քրեական գործի քննությունը, գործը պետք է ուղարկվեր դատարան, սակայն դատախազությունը քննված գործը ուղարկել է նոր քննության՝ մատնանշելով որոշ թերություններ: Նոր քննությունը, սակայն, ընթանում է գաղտնի ձևով, որից պաշտպանները տեղյակ չեն:
«Մինչ այս պահը մեզ որևէ բան հայտնի չէ: Ինչ-որ գործողություններ հավանաբար կատարվում են, բայց մեզ տեղյակ չեն պահում: Նախաքննությունը մտել է գաղտնի փուլ: Երբ այս քննությունն էլ ավարտվի, նյութերը տրամադրեն մեզ, նոր միայն կհասկանանք, թե ինչ է լրացուցիչ քննվել»,- «Առաջին լրատվական»-ի հետ զրույցում ասաց Ժիրայր Սեֆիլյանի պաշտպան Տիգրան Հայրապետյանը:
Մեր դիտարկմանը՝ կա՞ր լրացուցիչ քննության անհրաժեշտություն, Հայրապետյանը պատասխանեց. «Ինձ թվում է՝ ոչ: Պարզապես սկզբում գործի քննությունը շատ արագ ավարտվեց, բայց հետո հասկացան, որ պետք չէր այդքան արագ ավարտել, ու սկսեցին ձգձգել»,- ասաց փաստաբանը՝ միտումնավոր ձգձգման պրոցեսը հիմնավորելով նրանով, որ իրենց գործի նյութերին ծանոթանալու համար 3 ամիս ժամանակ են տվել, ինչը փաստաբանի պրակտիկայում բացառիկ դեպք է: «Այդպիսի բան չի լինում: Մի դեպքում 80 հատոր գործի նյութերին ծանոթանալու համար տրամադրվել էր 15 օր ժամանակ: Իսկ այս դեպքում 30 հատորի համար 10 օր էին տվել, հետո 10 օրը փոխեցին և դարձրին 3 ամիս: Այս փոփոխությունը ոչ համարժեք է»,- ասաց Հայրապետյանը:
Ամեն դեպքում, Հայրապետյանի խոսքով՝ այս օրերին պետք է որ ավարտվի գործի քննությունը, քանի որ գործը դատարան պետք է գնա մինչև մայիս ամիսը, քանի որ լրանում է Ժիրայր Սեֆիլյանի ու մյուսների կալանավորման մեկ տարին: Իսկ «Սասնա ծռեր»-ին օժանդակելու մեղադրանքով կալանավորված Կարո Եղնուկյանի գործի քննության վերջնաժամկետն էլ ապրիլի 10-ն է:
Մեր հարցին՝ միտում չի՞ տեսնում գործի քննության ձգձգման մեջ, Հայրապետյանը պատասխանեց. «Ես քաղաքական հարցերից բան չեմ հասկանում, ոչինչ չեմ կարող ասել, բայց ցանկացած բանական մարդ փաստերը վերլուծելիս կարող է հստակ եզրահանգման գալ»:
«Սասնա ծռեր»-ի անդամ Ալեք Ենիգոմշյանը, սակայն, «Առաջին լրատվական»-ի հետ զրույցում ասաց, որ գործի քննության վերսկսումը, ձգձգումը հստակ միտումնավոր է: Դա արվեց, որպեսզի գործի դատավարության սկսումը չհամընկներ ընտրական պրոցեսի հետ և լրացուցիչ աղմուկ չբարձրանար: «Այո, այստեղ հստակ միտում կա»,- ասաց Ենիգոմշյանը:
Ինչ վերաբերում է մինչ գործի նախաքննության վերսկսումը կատարված քննությանը, ապա Հայրապետյանի խոսքով՝ քննչական մարմինների կողմից այս ընթացքում մի քանի անհիմն որոշումներ են կայացվել, որոնցից առաջինը քրեական գործ հարուցելու որոշումն էր: «Որևէ ձևով արդարացված և հիմնավորված չէին քրեական գործ հարուցելու, մեղադրանք առաջադրելու և կալանավորելու որոշումները: Հետագայում արդեն նույն անհիմն կերպով գործերը միացվեցին իրար, ապա անջատվեցին, և այդպես շարունակ: Այսինքն՝ արեցին ամեն ինչ, որ Ժիրայր Սեֆիլյանը լրացուցիչ հոդվածներով մեղադրվի: Այսինքն՝ հիմա Սեֆիլյանը երեք լրացուցիչ և բավական ծանր հոդվածներով է մեղադրվում»,- ասաց Տիգրան Հայրապետյանը:
