Մարտի 30-ից սկսվել և այս շաբաթվա վերջում ավարտվելու են Երևանի ավագանու ընտրությունների առաջադրումները: Խորհրդարանական ընտրություններից առաջ և այս օրերին տարբեր քաղաքական ուժեր հայտարարում են, որ մասնակցելու են Երևանի քաղաքապետի ընտրություններին: Խորհրդարանական ընտրությանը մասնակցած 9 քաղաքական ուժերից Երևանի ավագանու ընտրություններին միանշանակ մասնակցելու են Հայաստանի Հանրապետական, «Բարգավաճ Հայաստան» կուսակցությունները: ՀՀԿ-ի դեպքում պարզ է, որ նրանց ցուցակը նորից գլխավորելու է Երևանի քաղաքապետ Տարոն Մարգարյանը, իսկ ԲՀԿ-ն դեռ այդ հարցին չի անդրադարձել:
Քաղաքապետի ընտրություններին միանշանակ մասնակցելու է նաև խորհրդարանական ընտրություններում երրորդ տեղը զբաղեցրած «Ելք» դաշինքը: Դաշինքի անդամ Էդմոն Մարուքյանն «Առաջին լրատվական»-ի հետ զրույցում ասաց, որ այս պահին իրենք ցուցակներն են կազմում, և երբ վերջնական որոշում ունենան, կհրապարակեն այն: Մարուքյանը չցանկացավ առայժմ նշել, թե ով է լինելու քաղաքապետի իրենց թեկնածուն: «Առաջին լրատվական»-ի տեղեկություններով, սակայն, «Ելք» կուսակցությունների դաշինքի անցնող պատգամավորների եռյակից միայն Նիկոլ Փաշինյանն ունի Երևան քաղաքի գրանցում, որը պարտադիր է քաղաքապետի թեկնածու առաջադրվելու համար։ Չի բացառվում, որ հենց Նիկոլ Փաշինյանը լինի քաղաքապետի «Ելքի» թեկնածուն։
7 պատգամավորով ԱԺ-ում հայտնված ՀՅԴ-ն նույնպես կմասնակցի Երևանի ավագանու ընտրություններին: Արսեն Համբարձումյանը մեզ հետ զրույցում ասաց, որ քննարկումների մեջ են, ցուցակի նախապատրաստական աշխատանքներ են, նիստ պետք է գումարեն, որպեսզի վերջնական հստակեցումներ մտցնեն և որոշեն, թե ով է քաղաքապետի իրենց թեկնածուն:
Անցողիկ շեմը չհաղթահարած «Հայկական վերածնունդը» դեռ որոշում չունի՝ մասնակցելո՞ւ է ընտրություններին, թե՞ ոչ: Կուսակցության մամուլի խոսնակ Էդգար Առաքելյանն ասաց, որ ամենաուշը վաղն իրենք կհայտարարեն իրենց որոշման մասին:
Կրկին անցողիկ շեմը չհաղթահարած «Ազատ դեմոկրատներ» կուսակցությունից մեզ հայտնեցին, որ դեռ չեն քննարկել հարցը: «Առաջիկայում կքննարկենք ու պաշտոնական հայտարարությամբ հանդես կգանք»,- մեզ հետ զրույցում նշեց «Ազատ դեմոկրատներ» կուսակցության փոխնախագահ Անժելա Խաչատրյանը:
ՕՐՕ դաշինքից այդպես էլ չպատասխանեցին մեր զանգերին:
Արտախորհրդարանական ուժերից Երևանի ավագանու ընտրություններին մասնակցության ցանկություն է հայտնել ՍԴՀԿ-ն: Կուսակցության ղեկավար Նարեկ Գալստյանը վերջերս մեզ հետ զրույցում ասել էր, որ իրենք բոլոր շանսերն ունեն քաղաքապետի ընտրություններին մասնակցելու, իսկ խորհրդարանականին չմասնակցեցին, քանի որ ժամկետների խնդիր ունեին և տեխնիկապես չէին հասցրել գրանցվել:
«Առաջին լրատվական»-ի տեղեկություններով՝ Երևանի ավագանու առաջիկա ընտրություններին մասնակցելու հայտ կներկայացնի Զարուհի Փոստանջյանի հիմնադրած «Երկիր ծիրանի» կուսակցությունը: Զարուհի Փոստանջյանը մասնակցության ավելի լայն պլատֆորմ է ակնկալում, և չի բացառվում, որ նրան աջակցեն խորհրդարանական ընտրություններին մասնակցած որոշ քաղաքական ուժեր:
Նշենք, որ խորհրդարանական կառավարման համակարգի դեպքում Երևանի քաղաքապետը, կարելի է ասել, վարչապետից ու Ազգային ժողովի նախագահից հետո ներքաղաքական կյանքում իր նշանակությամբ լինելու է երրորդ պաշտոնյան:
Կենտրոնական ընտրական հանձնաժողովը հրապարակել է տեղեկություններ 2017թ. մայիսի 14-ի Երևանի ավագանու ընտրությունների վերաբերյալ։ Ըստ այդմ՝ ոստիկանության տվյալներով, ընտրությանը մասնակցելու իրավունք ունեցողների թիվը 841 973 է։
Նախընտրական քարոզչության ժամանակահատվածում նախընտրական քարոզչության համար տրամադրվող վճարովի եթերաժամի ամենաթանկ սակագինը սահմանել են «Արմենիա»-ն ու «Շանթ»-ը՝ 100 հազար դրամ մեկ րոպեի համար: 60 հազար դրամ՝ Հանրային և Հ2 հեռուստաընկերությունները, 50 հազար դրամ՝ Հ3-ը, 40 հազար դրամ՝ «Ա-Թիվի»-ն, 25 հազար՝ «Երկիր Մեդիան», 20 հազարական դրամ են սահմանել «Արմնյուզ»-ն ու «Ար»-ը, 18 հազար դրամ՝ «Կենտրոն»-ը, և 10 հազար դրամ՝ «Արարատ» հեռուստաընկերությունը:
Ռադիոընկերություններից՝ «Ռադիոմարշալ» ռադիոծրագիրը՝ 2 հազար 500 դրամ մեկ րոպեի համար, «Հանրային» ռադիոն՝ 2 հազար դրամ, «Հայ էֆԷմ»-ը՝ 1800 դրամ, և «Ռադիո Հայ»-ը՝ 1800 դրամ:
