Հոգեբանական գիտությունների դոկտոր Սամվել Խուդոյանը բաց նամակ է հղել ՀՀ ԿԳՆ Գիտության պետական կոմիտեի նախագահ Սամվել Հարությունյանին՝ կոմիտեի կողմից գիտական և գիտատեխնիկական գործունեության պայմանագրային (թեմատիկ) ֆինանսավորման 2013թ. մրցույթի հոգեբանության ոլորտում առկա զավեշտալի փաստերի կապակցությամբ:
Այսօր լրագրողների հետ հանդիպմանը Խուդոյանը նշեց, որ կոմիտեում իրեն ընկալում են որպես թշնամի, մինչդեռ ինքը փորձում է օգնել իրենց կառույցին զարգանալ: Հոգեբանը նշեց, որ իր բաց նամակի պատճառը ոչ թե դժգոհ, այլ խաբված լինելու, Գիտության պետական կոմիտեի և նրա փորձագետների ակնհայտ մութ գործարքների մասին իր համոզմունքն է, որը ձևավորվել է մրցույթի հոգեբանության ոլորտում տեղի ունեցած զավեշտալի փաստերի և դրանց պարզ տրամաբանական վերլուծության արդյունքում:
«Ինձ ասում են, որ իմ աղջիկն ինձ հետ ընդգրկված է նույն գիտական խմբում: Որտե՞ղ է ասված, որ հայր ու աղջիկ իրավունք չունեն միասին գիտական հետազոտություն անցկացնելու»,- ասաց նա:
Խուդոյանի համար անհասկանալի է նաև՝ ինչո՞ւ հանրապետության խոշորագույն և առաջատար երկու բուհերից մեկի՝ Խ. Աբովյանի անվան պետական մանկավարժական համալսարանի գիտնականները պարբերաբար մերժվում են. մի բուհին տասնյակ գրանտներ են տրվում, մյուսին՝ մեկ: 2010թ. մրցույթում հաղթող են ճանաչվել ԵՊՀ-ից մոտ 30 թեմա, իսկ Խ. Աբովյանի անվան պետական մանկավարժական համալսարանից՝ 1 թեմա: 2013-ին հաղթող են ճանաչվել ԵՊՀ-ից մոտ 30 թեմա, իսկ Խ. Աբովյանի անվան պետական մանկավարժական համալսարանից՝ 1 թեմա:
Կենսաբանական գիտությունների դոկտոր, պրոֆեսոր Սիներիկ Հայրապետյանն էլ նկատեց, որ կոմիտեն կռիվ է հայտարարել և ազգային շահի նկատմամբ, և հենց իր՝ նախագահի, քանի որ նախագահը գրել է, որ այս հիմնարկն ունի գործնական-քաղաքական նշանակություն: «Քանի՞ գիտնական է վերջին տարիներին միջազգային կոնգրեսում ուղղորդող դասախոսություն ունեցել: Ես Պեկինում նման դասախոսություն եմ ունեցել, պարգևատրվել եմ: Մեզ ասում են՝ դուք շատ եք գնում միջազգային գիտաժողովների. մենք շատ ենք աշխատում, դրա համար էլ շատ ենք գնում»,- ասաց նա՝ նկատելով, որ շատերը օգտվում են նրանից, որ նախագահի գլուխը խառն է, վարչապետն ասում է՝ գիտելիքահեն տնտեսություն, բայց այսօրվա դրությամբ տգետահեն տնտեսություն է:
