Այսօր վաղ առավոտից մեծ ակտիվություն է նկատվում նաև թիվ 12 ընտրատարածքն ընդգրկող Վայոց ձորի ընտրատեղամասերում: Մարդկանց մեծ հոսք կա տեղամասեր, ինչն աննախադեպ երևույթ է, քանի որ այս մարզն առանձնապես ընտրություններին ակտիվությամբ աչքի չի ընկնում:
Ընտրատարածքում «Ծառուկյան» դաշինքի ռեյտինգային ցուցակով առաջադրված, Վայոց ձորի նախկին մարզպետ Սերգո Բագրատյանն «Առաջին լրատվական»-ի հետ զրույցում նույնպես ընտողների մասնակցությունն աննախադեպ համարեց: Նրա խոսքերով՝ մարդկանց հոսքին զուգահեռ նաև բազաթիվ խախտումներ են արձանագրել, որոնց մի մասն անգամ իրենց վերահսկողությունից դուրս է: Խոսքը զինծառայողների քվեարկության մասին է: Բագրատյանը պատմեց, որ և՛ Եղեգնաձորում, և՛ Վայքում տեղակայված զորամասերի զինծառայողներին քվեարկության են բերում մեծ խմբերով, ովքեր այդպես խմբով էլ տեղամաս են մտնում, և վերահսկողություն պահպանել, այլևս անհնար է դառնում: «Զինվորականների քվեարկությունը մտահոգիչ է, ցուցակ չկա, չգիտես՝ նախապես քանի հոգի է գալու: Գալուց էլ դժվար է վերահսկել: Զինվոներն էլ երիտասարդ տղաներ են, չենք ցանկանում միջամտել նրանց արածին, վախենում ենք վեճ սկսվի, նման խնդիրներ ունենք, դրա համար էլ հետ ենք քաշվում: Չգիտեմ՝ այս խնդիրը ոնց պետք է լուծվի»,- ասաց Բագրատյանը: Թեկնածուն նաև նշեց, որ շատ տեղամասերում ըտրողներին պատվիրվում է քվեարկությունից հետո «Ծառուկյան» դաշինքի քվեաթերթիկը դուրս բերել տեղամասից, որպես ապացույց այն բանի, որ նրանք «Ծառուկյան» դաշինքին ձայն չեն տվել: «Բազմաթիվ նման դեպքեր են եղել, բայց մարդիկ վախենում են հետո խոստովաել, որ քվեաթերթիկ են հանել դուրս: Բայց մենք այս պահի դրությամբ արդեն 4 դեպք արձանագրել ենք, դիմել ենք ոստիկանությանը՝ խնդրով, որ ստուգեն անձին, քանի որ նրա մոտ քվեաթերթիկ կա: Ոստիկանությունն էլ հանել ու տեսել է քաղաքացու մոտ «Ծառուկյան» դաշինքի քվեաթերթիկը:
Տարբեր տեղամասերում արձանագրվել է նաև նույնականացման սարքի անսարքության 3-4 դեպք, որից հետո մասնագետ է հրավիրվել, անսարքությունը վերացվել է և քվեարկությունը շարունակվել է:
Սերգեյ Բագրատյանը նշեց, որ մեծ խնդիր է նաև տեղամասերում ընտրողների կուտակումները: «Տեղամաս կա, որ մենք արձանագրել ենք 100 հոգանոց կուտակումներ: Եղեգնաձորի տեղամասերից մեկում անձրևի ժամանակ մոտ 100 հոգի մարդ մտել էր տեղամաս: Հասկանալի է, որ դրսում անձրև է, բայց դա չի նշանակում, որ դրա պատճառով պետք է օրենք խախտվի և քվեարակության պրոցեսը դուրս գա վերահսկողությունից, որի ժամանակ էլ մարդկանց փորձ են անում ուղղորդել՝ ում օգտին քվեարկեն: Սա է վիճակը»,- ասաց Բագրատյանը:
