Ադրբեջանական Anspress.com կայքի փոխանցմամբ, Ադրբեջանի նախագահ Իլհամ Ալիևն այսօր մեկնաբանել է ղարաբաղյան հակամարտության կարգավորման վերաբերյալ ԵԱՀԿ Մինսկի խմբի համանախագահների հայտարարությունը.
«Ադրբեջանի առջև ծառացած ամենացավոտ խնդիրը ղարաբաղյան հակամարտության չլուծված լինելն է։ Մեր բոլոր ջանքերն արդյունք չեն տվել, և խնդիրը մնում է չկարգավորված։ Ցայժմ կատարված չեն Լեռնային Ղարաբաղի վերաբերյալ ՄԱԿ-ի ԱԽ ընդունած 4 բանաձևերը, որոնցով պահանջվում է հայկական զորքերի դուրսբերումը։ Հայաստանը չի կատարում նաև ԵԱՀԿ-ի, Եվրախորհրդարանի, Եվրոպայի խորհրդի և միջազգային այլ կառույցների ընդունած բանաձևերը։
Այս խնդիրը պետք է շատ շուտով լուծում ստանա։ Մենք հուսով ենք, որ բանակցություններն արդյունք կտան։ Վերջին մի քանի ամիսներին առկա են այդ հույսերն ամրագրող բազմաթիվ գործոններ։ Կարող եմ ասել, որ վերջին մի քանի ամիսների ընթացքում ԵԱՀԿ Մինսկի խմբի համանախագահներն առաջին անգամ հայտարարեցին ստատուս քվոյի փոփոխման մասին։
Խնդրի կարգավորումից հետո տարածաշրջանում կտիրի խաղաղություն ու համագործակցություն, և բոլոր կողմերն օգուտներ կքաղեն իրադարձությունների զարգացման նմանատիպ սցենարից։ Ադրբեջանը երբեք չի համաձայնի անկախություն տրամադրել Ղարաբաղին»։
Հիշեցնենք, որ երեկ էլ ԵԱՀԿ Մինսկի խմբի համանախագահ երկրների նախագահների հայտարարության ինքնատիպ մեկնաբանությամբ էր հանդես եկել Ադրբեջանի ԱԳՆ-ն. «Այդ հայտարարությունից «հետևում» է, որ Հայաստանը պետք է իր զինված ուժերը դուրս բերի Ադրբեջանի «օկուպացված» տարածքներից, որպեսզի դրանով հնարավորություն ընձեռի ադրբեջանցի փախստականներին վերադառնալ իրենց տները և տարածաշրջանը դարձնել առավել կանխատեսելի:
Ադրբեջանի դիրքորոշումը մնում է նույնը, այն չի փոխվել: Հայկական զորքերի դուրսբերումը և հարկադիր վերաբնակների վերադարձը հնարավորություն կընձեռեն հետագա քայլեր անելու համար»:
