2012թ. խաղաղ բնակիչների շրջանում կասետային զինամթերքի կիրառման հետևանքով զոհերի թվի մեծ մասը բաժին է ընկել Սիրիային: Այս մասին հաղորդում է RIA Novosti-ն՝ վկայակոչելով Ժնևում հրապարակված կասետային զինամթերքի հարցերով իրավապաշտպան կոալիցիայի զեկույցը:
Կոալիցիայի փաստաթղթի համաձայն, որին անդամակցում է 350 ոչ կառավարական կազմակերպություն՝ աշխարհի 90 երկրներից, անցած տարվա ընթացքում կասետային զինամթերքից մարդկային զոհեր են գրանցվել Կամբոջայում, Լաոսում, Լիբանանում, Սերբիայում, Սիրիայում, Սուդանում, Վիետնամում, Լեռնային Ղարաբաղում: Սիրիայում զոհերի թիվն ամենաշատն է՝ 165 մարդ:
«Սիրիայի կողմից կասետային զինամթերքների լայն կիրառումը հանգեցրել է անիմաստ զոհերի քաղաքացիական բնակչության շրջանում, սակայն այս արգելված զենքի կիրառման համատարած քննադատումը ցույց է տալիս տրամադրվածության վճռականությունը կասետային զինամթերքների դեմ»,- հայտարարել է Human Rights Watch իրավապաշտպան կազմակերպության ներկայացուցիչ Մերի Ուորեմը:
Միևնույն ժամանակ զեկույցի հեղինակները արձանագրել են միջազգային հանրության հաջողությունները կասետային զինամթերքի ոչնչացման գործում. 2012թ.-ը ռեկորդային էր այս զենքի պաշարների ոչնչացման ծավալներով:
