Արարատի մարզի Արարատ քաղաքում քարոզարշավի ժամանակ «Ելք» դաշինքի առաջնորդ Էդմոն Մարուքյանն ասաց, որ այս դաշինքը ատելություն չի քարոզում, միայն դրական հույզեր է առաջացնում եւ շարժումը տանում դեպի փոփոխություններ:
«Վերջին 3 օրերի հետ կապված այն տեղեկություններին անդրադառնամ, որ իբր թե մենք փնովում, քննադատում ենք բացի իշխանություններից, նաեւ մյուսներին: Նման բան չկա, մենք շատ դրական ենք տրամադրված բոլորի նկատմամբ, բոլորին շատ սիրում ենք: Ուղղակի մի խնդիր կա՝ մենք ճշմարտությունը չենք կարող թաքցնել մեր քաղաքացիներից, մենք ճշմարտությունն ենք ասում»,- նշեց Մարուքյանը՝ հավելելով, որ իրենք դրական քարոզով գնում են դեպի հաղթանակ:
Դիմելով արարատցիներին նա նշեց. «Պատկերացրեք իրավիճակ, որ ապրիլի 5-ին պարզվի, որ ձեր հարեւանը «Ելք» դաշինքին չի ընտրել, ասենք ՀՀԿ-ի նախկին կամ ներկա կոալիցիոն գործընկերներին, որոնք էլի կոալիցիա են կազմել, եւ իրենց ընդդիմադիր ձայնը փոշիացել է ու գնացել է հանրապետականի օգտին, էդ սխալը էլ չեք կարողանալու ուղղել: Չեք կարողանալու ասել՝ դե լավ, նախագահական ընտրություններին սխալս կուղղեմ: Չեք կարող, չկա նախագահական ընտրություններ: Դրա համար պետք է ուղղակի սխալ թույլ չտալ: «Ելք» դաշինքը միավորված ընդդիմություն է, Հայաստանի հանրապետության քաղաքացիների պահանջով ձեւավորված ընդդիմություն է եւ միակ ուժն է, որը երբեք ՀՀԿ-ի հետ կոալիցիա չի եղել, կամ ընդդիմություն, որը հիասթափեցրել է»:
Մարուքյանը նաև խոստացավ՝ բացահայտելու ենք Հոկտեմբերի 27-ը, Մարտի 1-ն ու քաղաքական այլ սպանություններ:
Մանրամասները՝ տեսանյութում:
