«Սամվել Բաբայանի կողմից «Իգլա»-ի ներմուծումն ու դա ահաբեկչական նպատակներով կիրառելը հորինված հեքիաթ է, որը իրականության հետ ոչ մի աղերս չունի: Սամվել Բաբայանը այդքան միամիտ չէ»,- «Առաջին լրատվական»-ի հետ զրույցում ասաց ԱԱԾ պետի նախկին տեղակալ Գուրգեն Եղիազարյանը: Նրա խոսքով՝ նախ այդ զինատեսակը շատ խիստ հսկողության տակ է, և այդքան հեշտ չէ այն գնել ու տեղափոխել Հայաստան:
«Վերջին 5-6 տարվա մեջ Հայաստանում ահաբեկչության վերաբերյալ տասնյակ ամպագոռգոռ հայտարարություններ են հնչել, սակայն դրանցից ոչ մեկը իրականություն չի դարձել, և ոչ էլ հիմքեր են եղել կարծելու, որ դրանք իրական են եղել: Եվ հետո՝ այդ զինատեսակը լրջագույն հսկողության տակ է: Ոչ մի զինատեսակ այդպես չի հսկվում, որքան «Իգլա» հրթիռային համակարգը: Եվ ասել, թե կա հավանականություն այն բերելու Վրաստանից Հայաստան, բացառվում է: Այդ զենքը մինչև 10 կիլոմետր հանգիստ խոցում է ցանկացած ինքնաթիռ: Պատկերացնում եք, մեկ էլ պարզվում է, որ դա Վրաստանից բերել են և գտնվում է ինչ-որ մեկի ավտոտնակում: Թույլ տվեք այդ հեքիաթին չհավատալ»,- ասաց Եզիազարյանը:
Հարցին՝ այդ դեպքում ո՞վ է հորինել այդ հեքիաթն ու ինչի՞ համար, Եղիազարյանը նկատեց. «Դա շատ պարզ է, սցենարն էլ կրկնում է Նորքի ահաբեկչության սցենարը: Նորքի դեպքում էլ մամուլում նախապես տեղեկություն գնաց, որ այդպիսի խումբ կա, զինված, որը պատրաստվում է նախագահականը գրավել և այլն, որից հետո նոր միայն Նորքում հայտնաբերվեց խումբը»,- ասաց Եղիազարյանը՝ հավելելով. «Ինչ վերաբերում է Սամվել Բաբայանին, ապա մենք գործ ունենք գեներալ-լեյտենանտի ուսադիրները վաստակած մարդու հետ: Այս դեպքում էլ Սամվել Բաբայանին «վնասազերծելուց» առաջ հրապարակում եղավ, որ նրա գլխավորությամբ «Սասնա ծռեր-2» է լինելու: Եթե այս ամենը իրական լիներ, նման տեղեկությունների արտահոսք չէր լինի նախապես: Իսկ դա արվեց, քանի որ իրենց կարճ խելքով Սամվել Բաբայանը այդ ամենից հետո կփախչեր և կդառնար հետախուզվող, և այլևս ապացույցների կարիք չէր լինի: Իսկ Բաբայանը չփախավ, քանի որ անմեղ էր»:
Գուրգեն Եղիազարյանի խոսքով՝ Հայաստանում կազմակերպվող «ահաբեկչությունների» թիրախը ի վերջո Սերժ Սարգսյանն է, և իրենք այդ «հորինված ահաբեկչությունները» կանխելով՝ ցույց են տալիս, որ ցանկացած մարդ, ով հանկարծ խոսի Սերժ Սարգսյանի աթոռի մասին, ինչ բախտի կարժանանա:
«Այսօր Սերժ Սարգսյանի քաղաքական մայրամուտն է, և իրենք, այլ ելք չունենալով, դիմում են ցանկացած քայլի, որ հանկարծ իրենց շեֆի աթոռին մարդ չդիպչի: Հենց դրա համար էլ վնասազերծեցին Սամվել Բաբայանին, իսկ որպես ապացույց՝ այն մյուս երկուսի ցուցմունքները կդնեն, թե իբր Սամվել Բաբայանը իրենց հետ կապի մեջ է եղել, հանձարարականներ է տվել, մի երկու զանգ են տվել Սամվել Բաբայանին, գնացել հանդիպել են, այդ հեռախոսազանգերը կհանեն կդնեն գործի հիմքում և գործը կուղարկեն դատարան, եթե, իհարկե, գործը հասնի դատարան: Ասում եմ՝ շեֆի մայրամուտն է, թեղ խելքի գան, իզուր մարդկանց չմեկուսացնեն: Թույլ տվեք այս ամենին չհավատալ: Ի վերջո, փառապանծ գեներալ-լեյտենանտը այդքան միամիտ չէ: Եթե նա իրականում ինչ-որ բան կազմակերպեր, հաստատ կվնասեր աթոռը և դրա վրա նստածին: Նա հաստատ չէր վրիպի»,- եզրափակեց Գուրգեն Եղիազարյանը: