ԵՄ իշխանությունները Facebook, Google և Twitter ընկերություններին մեկ ամիս ժամանակ են տվել, որպեսզի նրանք ներկայացնեն սպառողների իրավունքների պաշտպանության մասին եվրոպական օրենսդրությանը համապատասխան ծառայություններ մատուցելու իրենց պայմանները, այլապես ընկերությունները կտուգանվեն։ Այս մասին հայտնում է Reuters գործակալությունը՝ հղում անելով իրավիճակին ծանոթ աղբյուրին։
Գործակալության տվյալներով՝ անցած տարվա դեկտեմբերին իշխանություններն ընկերություններին ծանուցագիր են ուղարկել այն մասին, որ սոցցանցերի կողմից ծառայությունների մատուցման որոշ պայմաններ հակասում են եվրոպական օրենսդրությանը։
Օրինակ, իշխանությունները քննադատել էին այն փաստը, որ օգտատերերը չեն կարող իրենց բնակության վայր հանդիսացող երկրում դիմել դատարան, այլ պարտավոր են այդ նպատակով ուղևորվել Կալիֆորնիա, որտեղ գտնվում են ընկերությունների գրասենյակները։
Ընկերությունները դեռևս չեն մեկնաբանել ստեղծված իրավիճակը։
Գործակալության աղբյուրի խոսքով՝ ընկերությունների ներկայացուցիչները խնդրի լուծման որոշ ուղիներ են առաջարկել և արդեն քննարկել դրանք եվրոպական իշխանությունների հետ հինգշաբթի։ Աղբյուրը հավելել է, որ հանդիպումն ընթացել է կառուցողական։
Գործակալությունը նշում է, որ այդ միջոցառումներին աջակցում է Եվրահանձնաժողովը, որը կարող է տուգանքներ կիրառել, եթե պահանջներն անտեսվեն։
