Հայաստանի Հանրապետական կուսակցության ներկայացրած ծրագիրը իրատեսական է և լինելու է շարունակական: Նախընտրական քարոզարշավի շրջանակներում Արաբկիր վարչական շրջանի բնակիչների հետ հանդիպմանն այս մասին ասաց Երևանի քաղաքապետ, ՀՀԿ համամասնական ցուցակի երկրորդ համար Տարոն Մարգարյանը: «Մեր կառավարման թիմը շատ լավ տեսնում է մեր կողմից նախանշված ծրագրերի իրականացման տեսլականը: Իսկ այսօրվա մեր կառավարության ծրագր երը տեսանելի են և հստակ: Մենք համոզված ենք, որ միասին ենք կառուցելու մեր երկիրը»,- նշեց Մարգարյանը:
Երևանի քաղաքապետը նկատեց, որ ՀՀԿ-ն ունեցել է նաև թերություններ և բացթողումներ, սակայն երբեք չի խուսափել դրանց համար պատասխանատվություն ստանձնելուց: «Հայաստանի Հանրապետական կուսակցությունն այն ուժն է, որը պատրաստ է իր վրա վերցնել մեր երազած Հայաստանը կառուցելու պատասխանատվությունը: Մենք ցանկանում ենք ունենալ անվտանգ երկիր, ցանկանում ենք երկրում փոփոխություններ տեսնել, ցանկանում ենք առաջընթաց տեսնել: Դրա համար մենք պետք է վստահենք պատասխանատու և փորձառու քաղաքական թիմին»,- հավելեց Տարոն Մարգարյանը:
Անդրադառնալով Արաբկիր վարչական շրջանը ներառող ընտրական տարածքում ՀՀԿ-ի ռեյտինգային ցուցակով առաջադրված պատգամավորի թեկնածուներին` Տարոն Մարգարյանն ընդգծեց, որ նրանք բոլորն էլ հեղինակություն են վայելում Արաբկիր վարչական շրջանում և կարող են բնակչության խնդիրները ներկայացնել օրենսդիր մարմնում, ինչպես նաև կարող են օգտակար լինել ՀՀԿ-ի նախանշած ծրագրերը օրենսդիրում կյանքի կոչելու գործին:
