Գնահատելով Համաներումը` այսօր «Ժողովրդի իշխանություն» հասարակական-քաղաքական նախաձեռնության նախագահ Զոյա Թադևոսյանը մեզ հետ զրույցում նշեց, որ անշուշտ, համաներումը լարվածությունը կթուլացնի:
«Այն առումով, որ խոսքի ազատության, արդարության համար ապօրինի ձերբակալված մարտիկներին փակի տակ պահելն ուղղակի ապտակ էր քաղաքացիական հասարակության, ժողովրդավարական հասարակություն ստեղծելու ձգտում ունեցող հասարակության համար: Հետևաբար, անշուշտ, համաներումը իր դրական ազդեցությունը կունենա, բայց դա չի նշանակում, որ մենք դա պետք է համարենք վերջնական հաղթանակ: Մենք դեռևս պետք է պայքարենք, որ այն սխալները, որոնք ժամանակին կատարվել են, այլևես մեր հասարակության մեջ տեղի չունենան: Խոսքս ընտրությունների մասին է, որ հայ ժողովուրդը կարողանա իր երկրի նախագահի ընտրություններին գնա վստահ: Ավելին՝ վստահ լինի, որ ընտրությունների արդյունքը լինելու է այնպիսին, ինչպիսին ժողովրդի քվեն է լինելու: Այդ առումով մենք դեռ պայքարելու խնդիր ունենք: Ուրեմն երկխոսությունը պետք է տեղի ունենա հենց այս հարցերի շուրջ»,- ավելացրեց Զոյա Թադևոսյանը: