Հայրենասիրություն չէ անվերջ աղաղակել, որ սահմանամերձ գյուղերը դատարկվում են, պետք է այցելել: Օգոստոսի 29-ին լրագրողների հետ հանդիպմանն այսպիսի կարծիք հայտնեց ԱԺ ՀՀԿ խմբակցության պատգամավոր, երգչուհի Շուշան Պետրոսյանը։ Նա ամփոփեց Արցախ կատարած իր մշակութային այցը: «Ինձ՝ որպես արվեստի մարդու, ով հաճախ է լինում սահմանում, առաջին անգամ բանակից դուրս լինելով՝ շատ հետաքրքիր եղավ՝ մշակութային ոլորտն ինչ մակարդակի է»,-ասաց նա:
Երգչուհին եղել է Մարտակերտում, Թալիշում, Մատաղիսում: Նրան մտահոգել է Մարտակերտի մշակույթի տան վիճակը. այնտեղ ոչ մի խմբակ չի գործում: Պետրոսյանի խոսքերով՝ որքան էլ արվեստին անլուրջ են վերաբերվում (թեև հեռուստատեսությամբ հետևելով՝ տեսնում ես, որ հիմքերը կան), հասկանում ես, որ պիտի ուժեր ներդնես, ուստի իր իսկ շնորհիվ վերաբացվել են Մարտակերտի մշակույթի տան խմբակներից մի քանիսը՝ երգի, նկարչական, ասմունքի, պարի: «Ինձ համար շատ ազդեցիկ էր սահմանային դպրոցներից մեկի տնօրենի արտահայտությունը՝ «Ես ուզում եմ, որ իմ խոխեքը սպարտացիներ մեծանան»: Այդ արտահայտությունը փոխեց ամեն ինչ: Ես շատ ուրախ եմ, որ ՀՀ ԱԺ պատգամավոր եմ, և դա կարող եմ ծառայեցնել ժողովրդին։ Այսօր շատ դռներ իմ առջև բաց են, ես առաջ անգամ չէի կարող դա պատկերացնել»,- ասաց երգչուհին, ում ջանքերով Թալիշի ու Մատաղիսի դպրոցներում վերաբացվել են քիմիայի, ֆիզիկայի, կենսաբանության լաբորատորիաները:
Շուշան Պետրոսյանը համոզված է՝ պետք է վերակենդանացնել մշակույթի տները, որոնք որպես այդպիսին չեն գործում: Թալիշում համացանցի մուտքը կարևորելով՝ երգչուհին մի խումբ սրտացավ մարդկանց հետ դրամահավաք է կազմակերպել: «Ես նախընտրում եմ որևէ բան անելիս ծրագրերի վրա ժամանակ չծախսել՝ միանգամից գնալ և գործն անել, դրա համար ընդամենը ցանկություն է պետք»,- ասաց նա: Ոչ մշակութային հարցերի մասին խոսել երգչուհին չցանկացավ՝ նկատելով. «Քանի՞ պատգամավոր կա ԱԺ-ում, թույլ տվեք ես զբաղվեմ իմ ոլորտով»:
Երգչուհին, սակայն, անդրադարձավ նաև վերջին շրջանում աղմուկ հանած դեպքին. ոստիկանի՝ ակտիվիստ աղջկան համբուրելու փաստին: «Անպատկառ վերաբերմունք ասելիս դուք համբու՞յրը նկատի ունեք: Դա թերևս ամենալավ վերաբերմունքն է: Համբույրի մեջ վատ բան կա՞: Ըստ նկարի շատ նուրբ է համբույրը: Դա մարդկային վարք է, գիտե՞ք: Դուք ծանո՞թ եք այդ աղջկան, կարող է նրա սիրած տղան է»,- ասաց երգչուհին՝ միաժամանակ նկատելով, որ ակտիվիստը հայ աղջիկ է, ում անվան հետ պետք չէ խաղալ՝ անընդհատ խոսելով այդ համբույրի մասին: