Ժամանակը և պրակտիկան ցույց են տալիս, որ Հայաստանի անդամակցությունն այլ ռազմաքաղաքական կառույցներում և համագործակցությունը ՆԱՏՕ-ի հետ ամբողջովին համատեղելի են:
ՆԱՏՕ-ի գլխավոր քարտուղար Յենս Ստոլտենբերգի հետ համատեղ ասուլիսի ընթացքում նման հայտարարությամբ է հանդես եկել ՀՀ Նախագահ Սերժ Սարգսյանը:
«Մեր տարածաշրջանում բազմաթիվ դերակատարներ կան և մենք փորձում ենք յուրաքանչյուր պարագայում մեր ազգային անվտանգության համար գտնել համագործակցության հնարավորություն, և երբեք 25 տարիների ընթացքում Հայաստանը չի փորձել որևէ շահ տեսնել կամ ունենալ այդ դերակատարների հակամարտությունից»,- շեշտեց Հանրապետության նախագահը:
Սերժ Սարգսյանի կարծիքով` դա կործանարար քաղաքականություն է: «Մենք նաև տարածաշրջանում համոզվեցինք իմ խոսքերի ճշմարտացիության մեջ»,- ընդգծեց ՀՀ Նախագահը:
«Անշուշտ, տարբեր նպատակներ են հետապնդում և ՀԱՊԿ-ը և ՆԱՏՕ-ն, բայց նորից եմ կրկնում, որ մեր պրակտիկան խոսում է այն մասին, որ հնարավոր է, որպեսզի երկիրն իր ազգային անվտանգությունն ապահովելու համար համագործակցության եզրեր գտնի տարբեր ձևաչափերում: Իմիջիայլոց, ասեմ, որ երբ Եվրամիության հետ բանակցություններ էինք վարում և խոսքը գնում էր Եվրասիական տնտեսական միությանը մեր անդամակցության մասին, և ԵՄ-ում որոշակի մտահոգություն էին հայտնում այս առիթով, մենք բերում էինք ՆԱՏՕ-ի օրինակը` ասելով, որ, լինելով ՀԱՊԿ-ի հիմնադիր անդամ, մենք 25 տարի է համագ ործակցում ենք ՆԱՏՕ-ի հետ, և դրանից ոչ մի վատ բան չի պատահում: Այնպես որ, կարծում եմ մեր օրինակն ուսանելի է, և մենք շարունակելու ենք մեր այս քաղաքականությունը»,- ամփոփեց Սերժ Սարգսյանը:
