Վարչապետ Տիգրան Սարգսյանն այսօր կառավարությունում հանդիպել է Արարատի մարզի Մասիսի թիվ 5 ավագ դպրոցի 10-րդ դասարանի հումանիտար հոսքի աշակերտների, Երևանի Նանսենի անվան թիվ 150 հիմնական դպրոցի 9-րդ դասարանի աշակերտների և Մարգարյանի անվան թիվ 29 ավագ դպրոցի 11-րդ դասարանի աշակերտների հետ։
«Կփորձեմ մեկ դասաժամի՝ 45 րոպեի ընթացքում, ներկայացնել մեր կառավարության գոյաբանության սկզբունքները»,- ասել է Տիգրան Սարգսյանը` մանրամասնելով, որ գոյաբանություն նշանակում է աշխարհընկալման միասնական հայեցակարգ, որի տարբերակներն այդքան էլ շատ չեն։
Ըստ նրա՝ ժամանակակից աշխարհում տեղի ունեցող իրադարձությունների ներքո էլ հենց կազմվում և իրականացվում են ՀՀ կառավարության ծրագրերը։ «Սա ենթադրում է, որ մենք նույնպես պետք է ունենանք մեր հստակ ընկալումը ժամանակակից աշխարհում տեղ գտնող գործընթացների մասին։ Մեր առջև մենք դրեցինք հետևյալ խնդիրը. որո՞նք են 21-րդ դարի ժամանակակից աշխարհում տեղի ունեցող փոփոխությունների հիմնական հատկանիշները, որոնք էական ազդեցություն են թողնում մեր կյանքի վրա, կառավարության ցանկացած ծրագրերի վրա։ Այդ առումով մենք դուրս բերեցինք կարևորագույն 5 հենասյուները, որոնց վրա պետք է կառուցեինք նաև մեր կառավարութան ծրագիրը՝ այն ներկայացնելով ԱԺ հավանությանը»,- ասել է վարչապետը։
Սկզբունքներից առաջինը կառավարության ղեկավարը համարել է արագ փոփոխությունները։ Նրա խոսքով, այսօր մեր կյանքի ընթացքում այնպիսի փոփոխություններ ենք տեսնում և այնպիսի արագությամբ, որ մեր պապերը դա կտեսնեին 100 տարվա ընթացքում. «Այսօր մի սերունդն իր կյանքի ընթացքում ապրում է լրջագույն փոփոխություններ, և սա համարվում է կարևորագույն մարտահրավեր հասարակության, սոցիալ-տնտեսական գործընթացների և մարդու համար։ Մարդիկ շատ հաճախ չեն հասցնում հարմարվել այս փոփոխություններին։ Գիտատեխնիկական հեղափոխությունը, ժամանակակից տեխնոլոգիաների մուտքը մեր կյանք էապես փոխում են մեր կենցաղը։ Լենինգրադում իմ ուսանելու ժամանակ ես միայն շաբաթը մեկ կարող էի հեռախոսով խոսել ծնողներիս հետ, այն էլ` պետք է այցելեի փոստ և այնտեղի հատուկ խցիկից միայն զանգեի Երևան, որը բավական թանկ հաճույք էր։ Իսկ հիմա տեխնիկական առաջընթացի շնորհիվ ցանկացած ժամանակ կարող ենք կապ հաստատել աշխարհի ցանկացած երկրի հետ, որը շատ մատչելի է»:
Վարչապետն ընդգծել է, որ հենց այդ հանգամանքը հաշվի առնելով է մշակվում կառավարության 5 տարվա զարգացման ծրագիրը` կանխատեսելով, որ այդ ժամանակահատվածում տեղի են ունենալու լրջագույն փոփոխություններ կենցաղի, արտադրության, սոցիալական ոլորտում։ Հետևապես, ցանկացած կառավարություն պետք է հաշվի առնի միջավայրի նման փոփոխությունը։ Հակառակ դեպքում, ըստ վարչապետի, մեր ծրագրերը չեն լինի արդյունավետ։
Ժամանակակից աշխարհի երկրորդ սկզբունքը, ըստ վարչապետի, օրեցօր փոքրացող աշխարհն է. շնորհիվ գիտատեխնիկական հեղափոխության պետությունների, ազգերի փոխհարաբերությունները, շփումներն էական առումով աճել են։
«Ստեղծվում են տարբեր միջազգային կառույցներ, որոնք ունեն առաքելություն՝ հեշտացնել պետությունների միջև շփումները, մասնավորապես` Առևտրի համաշխարհային կազմակերպությունը։ Այն պետությունները, որոնք անդամակցում են այս կառույցին, հռչակում են, որ տարիների ընթացքում մտադիր են նվազեցնել մաքսային տոկոսադրույքները, որպեսզի փոխանակումները պետությունների միջև լինեն ավելի հարմարավետ։ Հետևապես, աշխարհը դառնում է ավելի փոքր, և փոխազդեցություններն ուժգնանում են։ Նույնիսկ Լիբիայում տեղի ունեցող իրադարձությունն ազդում է Հայաստանի վրա, միջազգային շուկայում բարձրանում է նավթի գինը, հետևապես նաև Հայաստանի համար է այն բարձրանում»,- ասել է Տիգրան Սարգսյանը։ Նրա խոսքով, նախորդ դարը համարվում էր ինդուստրիալ զարգացման դար, կար արտադրողականության աճի մեծ մրցակցություն ապրանքների և ծառայությունների ոլորտում։
Միևնույն ժամանակ, գործադիրի ղեկավարը նշել է, որ այսօր զարգացած պետություն լինել ամենևին չի նշանակում ապրանքներ և ծառայություններ արտադրել։ Ըստ նրա՝ ժամանակակից պետություն լինել՝ նշանակում է արտադրել գիտելիք։ «Հետևապես, փոխվում է ժամանակակից տնտեսության շարժիչ ուժը, և պետությունները մրցակցում են այլ ոլորտում՝ ստեղծել միջավայր, որտեղ կարտադրվի նոր գիտելիք»,- նշել է կառավարության ղեկավարը՝ 4-րդ և 5-րդ սկզբունքներ համարելով մարդ անհատի արժևորումը, գնահատումն ու ազգային միասնությունը։ Տիգրան Սարգսյանի խոսքով, ՀՀ կառավարությունը ծրագրեր մշակելիս հենց այս սկզբունքներն է հաշվի առնում։
Վերջում վարչապետը պատասխանել է նաև աշակերտների հարցերին։ Նա ասել է, որ հայոց լեզվի պահպանման լավագույն միջոցը գրաբարը դպրոցներում և բուհերում ուսումնասիրության համար պարտադիր լեզու դարձնելն է: Ըստ նրա` դա աշակերտների համար կապահովի հայոց լեզվի ավելի խորը իմացություն։
