Հայաստանի Հանրապետության նախագահ Սերժ Սարգսյանը կրթության և գիտության նախարարության աշխատակազմի հետ հանդիպմանը փաստել է, որ կրթության և գիտության ոլորտները մեր երկրի համար նույնքան կարևոր են, որքան պաշտպանությունը, և պատահական չէ, որ բարեփոխումների շարքը մեկնարկել է հենց ԿԳ նախարարությունից:
Այսօր լրագրողների հետ հանդիպմանը ՀՀ ԿԳ նախարար Արմեն Աշոտյանը նշեց, որ նախագահը հանդիպել է կրթության և գիտության նախարարության ղեկավար կազմի, աշխատակազմի ստորաբաժանումների ղեկավարների հետ, նրան զեկուցվել է ուսումնական աշխատանքների ծավալի մասին, ներկայացվել են նախարարության կարճաժամկետ և երկարաժամկետ ծրագրերը, ուղղվել են մի շարք հարցեր, ընդ որում՝ ոչ միայն կրթության ոլորտին, այլև անվտանգությանը, ռազմարդյունաբերական, ԼՂ հակամարտության կարգավորմանը, քաղաքացիական հասարակության կայացման ներկայիս փուլին առնչվող:
Նախարարն անդրադարձավ ուսման վարձերի թանկացումներին: Նրա խոսքով՝ նախարարության բանաձևը մնում է նույնը. լավ սովորող ոչ մի ուսանող սոցիալական խնդիրների պատճառով չպետք է զրկվի ուսման հնարավորությունից, ավելին՝ իրենց դիրքորոշումն է՝ ընդլայնել անվճար կրթության իրավունքը, խրախուսել լավագույն ուսանողներին: Դիտարկմանը, թե ինչպես են որոշելու լավագույն ուսանողին, Աշոտյանը նշեց. «Որպեսզի հասկանանք՝ ով ինչպիսի ուսանող է, պետք է գոնե մեկ քննական շրջան անցնի»:
ԿԳ նախարարի համոզմամբ՝ որակի շարունակական աճ ապահովելով՝ պետք է նաև հստակեցնել պետության կարգավորիչ դերը: Ուսման վարձավճարների թանկացման դեմ, ըստ Աշոտյանի, հասարակական ընդվզում չկա, կան մի շարք խմբեր, որ իրենց դժգոհությունն են արտահայտում:
«Ինձնից ինտենսիվ և արդյունավետ որևէ այլ գործիչ չի աշխատել, իսկ ուսանողների բարձրախոսը միայն այդ խմբերը չեն, ուսանողներն իրենց ձայնը լսելի դարձնելու բազմաթիվ միջոցներ ունեն: Պետական մարմին-շահառուներ երկխոսությունը շատ արդյունավետ է, եթե բոլոր կողմերն իրենց ցանկությունների մեջ ազնիվ են»,- նշեց Աշոտյանը:
Նրա գնահատմամբ՝ ՀՀ-ում բարձրագույն կրթության որակը տարբեր է. չի կարելի ասել, որ ունենք որակյալ կրթություն, բայց նաև հակառակը պնդել չի կարելի. մեր կրթական համակարգում կան արդիականացման կարիք ունեցող, ոչ պիտանի և մրցունակ կրթական ծրագրերից մինչև լավագույն, եվրոպական որակի կրթական ծրագրեր:
«Ընդհանուր առմամբ՝ կրթության որակը չի կարող բավարարել որևէ մեկին, աշխատանքի կազմակերպման խնդիր կա, կան միջոցառումներ, որոնք պահանջում են հավելյալ ֆինանսական ներդրումներ, կան այնպիսիք, որոնք չեն պահանջում, սակայն եթե ուզում ենք պրոգրես տեսնել, պիտի խրախուսենք առաջընթացը»,- ասաց նա:
Նախարարը շեշտեց, որ իրենք երբեք չեն խուսափում խնդիրներից և դրանց մասին բարձրաձայնելուց, ավելին՝ նախագահին անկեղծորեն ներկայացրել են իրականությունը: Կրթության ոլորտում կան մի շարք խնդիրներ, որոնք կապված են բարեփոխումների հետ: Դրանցից առաջինը 12-ամյա կրթությունն է, երկրորդը՝ ավագ դպրոցները, երրորդ տեղում կոռուպցիան է: 12-ամյա կրթությունը, ըստ Աշոտյանի, շտկման կարիք ունի, սակայն՝ բովանդակային առումով: Նախարարի համար անընդունելի են 12-ամյա կրթությանն ուղղվող քննադատությունները, քանի որ մեզ մոտ այն ներդրվել է 2006-ից, այսինքն՝ մինչև 2018 թվականը շրջանավարտ չունեն, ուստի չի կարելի պնդել, որ այն անարդյունավետ է: Վերջում նախարարը խոստացավ, որ ուսումնական տարին կլինի հետաքրքիր, նախարարության աշխատանքը՝ բաց ու թափանցիկ:
Լուսանկարը՝ PanARMENIAN Photo-ի
