«Առաջին լրատվական»-ի զրուցակիցն է «Հանրապետություն» կուսակցության առաջնորդ, «Ելք» դաշինքի անդամ Արամ Զ. Սարգսյանը:
-Պարոն Սարգսյան, արդեն հայտնի է, թե որ կուսակցությունները, որ դաշինքներն են մասնակցելու ընրություններին, ներկայացած են նաև համամասնական ցուցակները: Դուք բազմիցս նշել եք, որ այս ընտրություններին Ձեր հիմնական թիրախը լինելու են իշխանությունները, և ՀՀԿ-ի ցուցակը գլխավորում է պաշտպանության նախարարը: Սա, ըստ Ձեզ, ինչի՞ համար է արվել ՀՀԿ-ի կողմից:
-ՀՀԿ-ի կողմից վերջին շրջանում կատարվող քայլերը անգամ շատ-շատ հանրապետականների համար էին անկանխատեսելի և անհաշվարկելի, դա իրենց ներքին խնդիրն է, թող իրենք իրենց խնդիրները փորձեն ներսում լուծել: Ի՞նչ արժանիքներից ելնելով են Վիգեն Սարգսյանին դրել առաջին համար: Ես պետք է խոստովանեմ, որ որևէ անձնական խնդիր չունենալով Վիգեն Սարգսյանի անձի հանդեպ՝ որևէ կերպ չեմ կարողանում այդ մարդուն ընկալել որպես պաշտպանության նախարար, որովհետև նա եկած առաջին իսկ օրվանից կամ 1000 դրամի խնդիր է փորձում լուծել, կամ զինվորը ծխախոտ ծխի՞, թե՞ պեչեննի ուտի. այս խնդիրն է ուզում լուծել, այն դեպքում, երբ մեր բանակը գերկարևոր խնդիրներ ունի ապրիլյան դեպքերից հետո՝ սկսած դիրքերում ինժեներական կառույցների, զինվորների ապահովության, այս հիբրիդային պատերազմի խնդիրներից մինչև օր օրի զոհեր ունենալու խնդիրը: Իմ կարծիքով՝ Վիգեն Սարգսյանը ավելի շատ պիոներ- ջոկատավարի է նման, քան պաշտպանության նախարարի, և այս մարդուն իր այս քայլերից հետո բերել և ցուցակի առաջին համա՞րը դնել: Գիտեք, այսպիսի ասացվածք կա, ասում են՝ գյուղացին իր հավն ուտում է երկու դեպքում, երբ հավն է հիվանդ կամ երբ գյուղացին է հիվանդ: Իմ տպավորությամբ՝ այս պարագյում երկուսն էլ հիվանդ են՝ թե՛ գյուղացին, թե՛ հավը, այս տրամաբանության մեջ պիտի բացատրես:
-Պարոն Սարգսյան, Հանրապետական կուսակցությունը ընտրել է «Անվտանգություն և առաջընթաց» կարգախոսը, որով մասնակցելու է առաջիկա ընտրություններին, ի՞նչ եք կարծում, հասարակության մոտ սա վստահություն կարո՞ղ է ներշնչել, քանի որ սրանով կարծես հանրության նուրբ լարերին են դիպչում:
-Իմ կարծիքով՝ առաջին դեպքն է, որ նեղ անձնական կարգաախոս են ընտրել, որը վերաբերում է իրենց անվտանգությանը և իրենց առաջընթացին, որովհետև իրենք հասկացել են, որ այս տարիներին իրենց ունեցած առաջընթացը այնքան է առաջ ընկել ժողովրդի իրական իրավիճակից, որ անվտանգության խնդիր է առաջացել, դրա համար փորձում են նաև անվտանգության բաղադրիչը դնելով ՝իրենց առաջընթացն ապահովել:
Ինձ համար մշտապես ակնհայտ է եղել, որ ՀՀԿ-ն և նրա արբանյակ, նրա հետ կոալիցիայի մաս կազմած բոլոր կուսակցությունները քաղաքական գործընթացների մեջ են մտել ոչ թե պատգամավորի 500 000 դրամ աշխատավարձը ստանալու համար, այլ իրենց սեփականությունը պահելու, իշխանություն ունենալու և փող աշխատելու, իրենց ազգուտակին աշխատանքով ապահովելու, աշխարհի մակարդակով լավ ապրելու և նմանատիպ շատ-շատ այլ բաների համար:
Հարցազրույցն ամբողջությամբ՝ տեսանյութում:
